تل ابیب (19 اگست 2026): اسرائیل نے موجودہ انتظامی حیثیت (اسٹیٹس کو) کی صریح خلاف ورزی کرتے ہوئے مسجد اقصیٰ میں یہودیوں کو عبادت کی باضابطہ اجازت دے دی۔

عرب میڈیا کے مطابق اسرائیلی حکام نے پہلی بار مقبوضہ مشرقی یروشلم میں مسجدِ اقصیٰ کے اندر یہودیوں کو مذہبی عبادت کی باضابطہ اجازت دے دی ہے، جو اس مقام کی کئی دہائیوں سے قائم موجودہ انتظامی حیثیت کی ایک صریح خلاف ورزی ہے۔

یروشلم اسلامی وقف کا کہنا ہے کہ اسرائیلی پولیس نے اتوار کے روز مسجدِ اقصیٰ میں دھاوا بولنے والے آبادکاروں کو سِدوریم (یہودی دعاؤں کی کتابیں) اندر لے جانے اور اجتماعی عبادت کرنے کی اجازت دی۔

اگرچہ ماضی میں بھی اس نوعیت کی سرگرمیاں ہوتی رہی ہیں، لیکن زیادہ تر یہ سرکاری اجازت کے بغیر انجام دی جاتی رہی ہیں۔ اب انھیں باضابطہ طور پر اجازت دینے کا فیصلہ ایک اہم تبدیلی کی نشان دہی کرتا ہے۔

وقف کا کہنا ہے کہ کسی مقام پر بطور زائر آنا اور وہاں عبادت کرنے کے لیے آنا، دونوں میں ایک اہم فرق ہے، باضابطہ اجازت ملنے کا مطلب یہ ہے کہ اب وہ اس جگہ اپنے قواعد بھی قائم کر سکیں گے۔

یاد رہے کہ اسٹیٹس کو ایک کئی دہائیوں پرانا اور بین الاقوامی سطح پر تسلیم شدہ انتظام ہے، جس کے تحت مسجدِ اقصیٰ تک رسائی اور اس کے انتظام و انصرام کے معاملات دیکھے جاتے ہیں۔ اس انتظام کے تحت 14.4 ہیکٹر پر مشتمل پورے احاطے کو خصوصی طور پر اسلام کا مقدس مقام تسلیم کیا جاتا ہے۔

مسجد تک رسائی، عبادت کے انتظامات، دیکھ بھال اور کھدائیوں کی ذمہ داری ’یروشلم اسلامی وقف‘ کے پاس ہے، جو مسجد کا انتظام چلانے والا مذہبی ادارہ ہے۔ تاہم 1967 میں مشرقی یروشلم پر قبضہ کرنے کے بعد سے اسرائیل نے بتدریج اس موجودہ انتظامی حیثیت کو کمزور کیا ہے، اور یہودیوں کو باضابطہ طور پر عبادت کی اجازت دینا اس سلسلے کا تازہ ترین قدم ہے۔

کئی برسوں سے اسرائیلی فورسز مسجدِ اقصیٰ میں روزانہ کے دھاووں کے دوران اسرائیلی شہریوں کو وہاں عبادت کرنے سے چشم پوشی کرتی رہی ہیں۔

Source: Admin