بھارت کے T20 ورلڈ کپ 2026 کے لیے 15 رکنی اسکواڈ کا اعلان

بھارت کے T20 ورلڈ کپ 2026 کے لیے 15 رکنی اسکواڈ کا اعلان ہفتہ کی دوپہر کو کر دیا گیا ہے، جس میں اجیت اگرکر کی قیادت میں سلیکشن کمیٹی نے کچھ حیران کن اور بڑے فیصلے کیے ہیں۔سب سے بڑا دھچکا نوجوان بلے باز شوبمن گل کو لگا ہے جنہیں خراب فارم کی وجہ سے اسکواڈ سے ڈراپ کر دیا گیا ہے۔ انہوں نے 2025 میں ایک بھی نصف سنچری اسکور نہیں کی تھی۔ سوریہ کمار یادو ٹیم کی قیادت کریں گے جبکہ اکشر پٹیل کو ٹیم کا نائب کپتان مقرر کیا گیا ہے۔ایشان کشن اور رنکو سنگھ کی واپسی: ایشان کشن کو سید مشتاق علی ٹرافی میں شاندار کارکردگی (500 سے زائد رنز) کی بنیاد پر بطور بیک اپ وکٹ کیپر شامل کیا گیا ہے۔ رنکو سنگھ کی بھی اسکواڈ میں واپسی ہوئی ہے۔گل کی غیر موجودگی میں اب سنجو سیمسن اور ابھیشیک شرما کے اننگز کا آغاز کرنے کا امکان ہے۔بھارت نے اسپن بولنگ پر زیادہ بھروسہ کیا ہے اور اسکواڈ میں چار اسپنرز شامل کیے ہیں۔فاسٹ بولنگ کے شعبے میں جسپریت بمراہ، ارکشدیپ سنگھ اور ہرشیت رانا شامل ہیں، جبکہ ہاردک پانڈیا اور شیوم دوبے آل راونڈر کے طور پر معاونت کریں گے۔T20 ورلڈ کپ 7 فروری 2026 سے شروع ہوگا، جس کی میزبانی بھارت اور سری لنکا مشترکہ طور پر کر رہے ہیں۔ بھارت اپنا پہلا میچ ممبئی کے وانکھیڑے اسٹیڈیم میں امریکہ کے خلاف کھیلے گا۔ روایتی حریفوں کے درمیان بڑا مقابلہ اتوار، 15 فروری کو کولمبو میں کھیلا جائے گا۔ورلڈ کپ سے قبل بھارتی ٹیم نیوزی لینڈ کے خلاف پانچ میچوں کی سیریز کھیلے گی جو 21 جنوری سے شروع ہو رہی ہے۔

Source: social media