سپریم کورٹ کے جج پی بیٖ ورالے کا کہنا ہے کہ ناسک کمبھ کے بجٹ کا اگر 0.1 فیصد بھی مراٹھی اسکولوں پر خرچ کیا گیا ہوتا تو اس سے 100 اسکولوں کو بند ہونے سے بچایا جا سکتا تھا۔ دراصل حال ہی میں خبر آئی تھی کہ فنڈ کی کمی کی وجہ سے مہاراشٹر میں مراٹھی میڈیم کے 100 اسکولوں پر تالے لگ گئے ہیں۔ اسی کو پیش نظر رکھتے ہوئے ہفتہ (22 اگست) کو ایک پروگرام کے دوران جسٹس ورالے نے کہا کہ اسکولوں کی حالت بدتر ہے اور اس پر توجہ دینے کی ضرورت ہے۔

’لائیو لا‘ کے مطابق ورالے نے وزیر اعلیٰ کے بیان کا حوالہ دیتے ہوئے کہا کہ ناسک کمبھ میں مہاراشٹر حکومت بنیادی ڈھانچے پر 34 ہزار کروڑ روپے اور کوریڈور منصوبہ پر 11 ہزار کروڑ روپے خرچ کر رہی ہے۔ انہوں نے کہا کہ اگر اس بجٹ کا صرف 0.1 فیصد یعنی 32 کروڑ روپے بھی خرچ کر دیا گیا ہوتا تو 150-100 اسکولوں کو بند ہونے سے بچایا جا سکتا تھا۔

جسٹس ورالے نے پروگرام کے دوران یہ بھی کہا کہ پہلے تعلیم کے لیے بجٹ میں مختص رقم 12-8 فیصد ہوتا تھا، اس میں کمی آئی ہے۔ یہ تشویشناک ہے، اسے بہتر کرنے کی ضرورت ہے۔ جسٹس ورالے نے مزید کہا کہ رہائشی اسکولوں پر توجہ دینے کی ضرورت ہے۔ انہوں نے ایک واقعہ کا ذکر کرتے ہوئے کہا کہ ’’ایک جگہ پر 3 لڑکیاں فرش پر سو رہی تھیں۔ سانپ کے کاٹنے سے ان کی موت ہو گئی۔‘‘

واضح رہے کہ ناسک میں 2027 میں کمبھ کا میلہ لگنے جا رہا ہے۔ اس کی تیاری شروع کر دی گئی ہے۔ مہاراشٹر حکومت کے مطابق کمبھ کے ترقیاتی منصوبے پر 22425.39 کروڑ روپے خرچ کیے جائیں گے۔ مہاراشٹر کے وزیر اعلیٰ کے مطابق مستقل اور عارضی ترقیاتی کاموں پر تقریباً 34732 کروڑ روپے خرچ کیے جائیں گے۔ ناسک اتھارٹی کے اندازے کے مطابق کمبھ میں تقریباً 12 کروڑ عقیدت مند آ سکتے ہیں۔ دوسری جانب ریلوے کا ماننا ہے کہ 3 کروڑ عقیدت مند بذریعہ ٹرین کمبھ میلہ میں شامل ہونے کے لیے جا سکتے ہیں۔

قابل ذکر ہے کہ نپّانی میں پیدا ہوئے پی بی ورالے 2024 سے سپریم کورٹ کے جج ہیں۔ جون 2027 میں وہ ریٹائر ہونے والے ہیں۔ سپریم کورٹ سے قبل جسٹس ورالے کرناٹک ہائی کورٹ کے چیف جسٹس تھے۔ انہوں نے اپنی ابتدائی تعلیم مہاراشٹر کے ناندیڑ، لاتور اور ناسک سے کی ہے۔ ایل ایل بی کی تعلیم کے لیے وہ بابا صاحب امبیڈکر یونیورسٹی چلے گئے۔ 2008 میں بامبے ہائی کورٹ میں جج مقرر ہوئے۔

Source: Admin