سعودی عرب کی وزارتِ داخلہ نے حجاج کرام سے اپیل کی ہے کہ ایامِ تشریق کے دوران جمرات، طواف اور سعی کے لیے جاتے اور واپس آتے وقت وہ صرف متعین کردہ راستوں پر چلیں اور جمرات کی عمارت یا مسجد الحرام میں سامان نہ لے کر جائیں۔ وزارتِ داخلہ کے سکیورٹی ترجمان کرنل طلال بن عبدالمحسن بن شلحوب نے ہفتے کے روز ایک پریس بیان میں زور دیا کہ حجاج کو تفویج کے نظام الاوقات کی پابندی کرنی چاہیے اور ایامِ تشریق کے دوران نقل و حرکت میں ہدایات پر مکمل عمل درآمد کے ساتھ ساتھ سکون اور نظم و ضبط کا مظاہرہ کرنا چاہیے۔ کرنل طلال بن شلحوب نے ان حجاج سے بھی خصوصی اپیل کی جو ایامِ تشریق کے دوسرے دن جلد واپسی کا ارادہ رکھتے ہیں کہ وہ اپنے خیموں میں ہی قیام کریں اور اپنے متعلقہ خدمت گار اداروں کی طرف سے طے شدہ وقت پر ہی روانہ ہوں۔ انہوں نے واضح کیا کہ سکیورٹی اور تنظیمی کوششیں منظور شدہ منصوبے کے تحت، حجاج کرام کی مکمل سلامتی اور مناسک کی ادائیگی کے بعد ان کی بخیریت واپسی تک جاری رہیں گی۔ دوسری جانب مسجد الحرام اور مسجد نبوی ﷺ کے امور کی دیکھ بھال کی جنرل اتھارٹی نے اعلان کیا ہے کہ حجاج کرام کی سہولت کے لیے ان کے سامان کو محفوظ رکھنے کی خدمت فراہم کر دی گئی ہے، تاکہ وہ باآسانی مناسک ادا کر سکیں۔ اس مقصد کے لیے چار مراکز مخصوص کیے گئے ہیں۔ اس دوران حجاج کرام تینوں جمرات کی رمی کا سلسلہ جاری رکھے ہوئے ہیں جہاں وہ سب سے پہلے جمرہ صغریٰ، پھر وسطی اور آخر میں جمرہ عقبہ کو کنکریاں مار رہے ہیں۔

Source: social media