جموں کشمیر کے کرکٹر فرقان بھٹ پر لگی پابندی ، ہیلمیٹ پر فلسطین کا جھنڈا لگا کر میچ کھیلنے اترے تھے فرقان

جموں۔ کرکٹر فرقان بھٹ پر جے سی ایل میں کھیلنے پر پابندی عائد کر دی گئی ہے۔ جموں میں منعقد ہونے والا ایک کرکٹ ٹورنامنٹ تنازعات میں گھر گیا ہے۔ فرقان کے ہیلمٹ پر فلسطینی جھنڈا تھا جس سے ٹورنامنٹ میں افراتفری مچ گئی۔ فرقان بھٹ نامی کرکٹر جموں و کشمیر چیمپئنز لیگ میں اپنے ہیلیمٹ پر فلسطین کا جھنڈا لگا کر میدان میں اترے تھے ۔ معاملہ سامنے آنے کے بعد جموں و کشمیر پولیس نے تحقیقات کا آغاز کیا۔ ٹیم کے آرگنائزر زاہد بھٹ نے پولیس کو بتایا کہ انہیں اس بات کی کوئی جانکاری نہیں تھی ۔ منتظم نے فون کال کے ذریعے پولیس کو اطلاع دی۔ معاملے کی سنگینی کو دیکھتے ہوئے فرقان بھٹ کے مستقبل میں لیگ کھیلنے پر پابندی عائد کرنے کا فیصلہ کیا گیا ہے۔ یہ میچ جموں کے کے سی اسپورٹس کلب میں منعقد ہوا تھا ۔ پولیس فی الحال معاملے کی تحقیقات کر رہی ہے۔ ذرائع کے مطابق فرقان بھٹ کو جموں و کشمیر پولیس نے پوچھ گچھ کے لیے طلب کیا ہے۔ پولیس اس بات کا تعین کرنے کی کوشش کر رہی ہے کہ میچ کے دوران ایسی علامت کے استعمال کے پیچھے کیا مقصد ہے اور آیا منتظمین سے اجازت لی گئی تھی یا نہیں۔ جموں اور کشمیر سے تعلق رکھنے والے نوجوان کرکٹر فرقان بھٹ ایک مقامی کرکٹر ہیں جو جموں اور کشمیر چیمپئنز لیگ میں کھیلتے ہیں۔ یہ لیگ وادی کشمیر میں کرکٹ کے جوش و خروش کو فروغ دینے کے لیے ایک مقامی ٹورنامنٹ ہے، جہاں نوجوان ٹیلنٹ اپنی صلاحیتوں کا مظاہرہ کرتے ہیں۔ فرقان ان نوجوان کشمیریوں میں سے ایک ہیں جنہوں نے مشکل حالات کے باوجود کرکٹ کو اپنا جنون پایا۔ وادی میں کرکٹ ہمیشہ سے مقبول رہی ہے۔ پرویز رسول اور عمران ملک جیسے کھلاڑی یہاں سے ابھر کر قومی سطح پر چمکے ہیں۔ فرقان جیسے مقامی کھلاڑی بھی یہی خواب سجوئے ہوئے میدان میں اترتے ہیں۔ تاہم اس تنازع کے بعد فرقان کے کیرئیر پر سوالیہ نشان لگ گیا ہے۔ متنازعہ معاملہ سامنے آنے کے بعد بی جے پی ایم پی پروین کھنڈیلوال برہم ہوگئے۔ انہوں نے کہا کہ “اگر آپ ہندوستان میں رہنا چاہتے ہیں تو آپ کو ہندوستانی پرچم لہرانا ہوگا۔ جو بھی فلسطینی پرچم لہرائے گا اسے ہندوستان سے محبت نہیں سمجھا جائے گا۔ جو ہندوستان سے محبت نہیں کرتے وہ یہاں سے چلے جائیں۔” اس دوران پولیس جموں و کشمیر چیمپئنز لیگ کے منتظم زاہد بھٹ سے بھی پوچھ گچھ کر رہی ہے۔ تحقیقاتی ایجنسیاں یہ واضح کرنا چاہتی ہیں کہ کیا لیگ کے دوران قواعد و ضوابط پر عمل کیا گیا تھا، اور کیا اس طرح کی سرگرمیاں امن و امان کی صورتحال کا باعث بن سکتی تھیں۔ پولیس ذرائع کا کہنا ہے کہ معاملہ چونکہ حساس ہے اس لیے ہر پہلو سے تفتیش کی جارہی ہے۔ پولیس کی جانب سے فی الحال کوئی باضابطہ بیان جاری نہیں کیا گیا ہے ۔تحقیقات مکمل ہونے کے بعد ہی صورتحال واضح ہوگی۔

Source: social media