فیفا ورلڈ کپ 2026: سعودی عرب نے حیران کر دیا، 41 ویں منٹ میں عبداللہ العمری کا شان دار گول

میامی (16 جون 2026): گروپ ایچ کے پہلے ورلڈ کپ میچ میں سعودی عرب اور یوراگوئے نے 1-1 سے برابر مقابلہ کھیلا۔ سعودی عرب کے لیے عبداللہ العمری نے پہلا گول اسکور کیا، تاہم یوراگوئے کے میکسی آراوخو نے اس برتری کو ختم کرتے ہوئے اسکور برابر کر دیا۔ یہ ایسا میچ تھا جس میں دونوں ٹیموں کو گول کیپروں کی غلطیوں کا فائدہ پہنچا۔ پہلا ہاف زیادہ تر یوراگوئے کے کنٹرول میں رہا، لیکن کھیل کے برخلاف سعودی عرب نے 41 ویں منٹ میں برتری حاصل کر لی۔ ایک سیٹ پیس کے دوران یوراگوئے کے گول کیپر فرنینڈو موسلیرا سے مہنگی غلطی ہوئی، جب انھوں نے گیند کو صحیح طرح قابو کرنے کی بجائے اسے عبداللہ العمری کے سامنے پہنچا دیا، جنھوں نے موقع سے فائدہ اٹھاتے ہوئے بال کو تجربہ کار گول کیپر کے پاس سے جال میں پہنچا دیا۔ دوسرے ہاف کا زیادہ تر کھیل سعودی عرب کے حصے میں کھیلا گیا، جہاں یوراگوئے برابری کا گول کرنے کے لیے مسلسل دباؤ ڈالتا رہا۔ ان کی یہ کوشش اس وقت رنگ لائی جب سعودی عرب کے گول کیپر محمد العویس سے بھی ایک غلطی ہوئی۔ ان کی بچائی گئی گیند میکسی آراوخو کے سامنے آ گئی، جنھوں نے فوراً شاٹ لگا کر بال جال میں پہنچا دی اور اسکور 1-1 کر دیا۔ اس برابری کے بعد گروپ ایچ کی صورت حال نہایت دل چسپ ہو گئی ہے۔ اس سے قبل اسپین اور کیپ وردے کا میچ بھی برابر رہا تھا، جس کے نتیجے میں گروپ کی چاروں ٹیموں کے پاس ایک ایک پوائنٹ موجود ہے۔

Source: Social Media