فیفا نے ورلڈ کپ کو ٹیلر سوئفٹ کا کنسرٹ بنا دیا، پرستاروں کی تنقید

لندن : فٹبال ورلڈ کپ کے پرانے اور انتہائی وفادار شائقین اس بات پر ناراض دکھائی دیتے ہیں کہ فیفا نے اسے ایک مہنگی تجارتی تفریح بنا دیا ہے۔ فٹبال پرستار فیفا پر تنقید کر رہے ہیں کہ ورلڈ کپ کو ٹیلر سوئفٹ کے کنسرٹ کی طرح سمجھا جا رہا ہے، انگلینڈ کے مشہور فٹ بال پرستار بلی گرانٹ، جو 1990 کے ایڈیشن کے بعد سے ہر عالمی کپ میں شرکت کرتے آ رہے ہیں، اس بار زیادہ قیمتوں کی وجہ سے امریکا، کینیڈا اور میکسیکو کا سفر نہیں کر سکیں گے۔ شائقین کا کہنا ہے کہ فیفا نے ورلڈ کپ کو کھیل کے عالمی عوامی تہوار کی بجائے ایک مہنگی تجارتی تفریح بنا دیا ہے، جس کے نتیجے میں حقیقی اور پرانے فٹ بال شائقین کے لیے اس میں شرکت عملاً ناممکن ہوتی جا رہی ہے۔ ٹکٹوں، سفر اور قیام کے غیر معمولی اخراجات کی وجہ سے وہ مداح جو برسوں سے ورلڈ کپ کا حصہ بنتے آئے ہیں خود کو باہر محسوس کر رہے ہیں۔ فیفا پر یہ الزام لگایا جا رہا ہے کہ وہ شائقین کی وابستگی اور جذبات کی بجائے زیادہ سے زیادہ مالی منافع کو ترجیح دے رہا ہے، اخری 3 عالمی کپوں میں شرکت کرنے والی پرستار ریگ لوٹن کہتی ہیں کہ بین الاقوامی فٹ بال فیڈریشن فیفا عالمی کپ کو امریکی گلوکارہ ٹیلر سوئفٹ کے کنسرٹ کی طرح لے رہا ہے۔ شیفیلڈ یونائیٹڈ کی پرستار ریگ لوٹن نے کہا ’’میں اور میرے شوہر نے برازیل، روس اور قطر میں ہونے والے پچھلے عالمی کپ ٹورنامنٹس میں شرکت کی لیکن اب صورت حال مختلف ہے۔ فیفا عالمی کپ کو ٹیلر سوئفٹ کے کنسرٹ کی طرح سمجھ رہا ہے، میرے لیے بہتر ہے کہ میں یہ رقم کسی خیراتی ادارے کو دوں بجائے اس کے کہ فیفا کو دوں۔‘‘ بلی گرانٹ نے ہفتے کو مشہور امریکی ویب سائٹ ’دی ایتھلیٹک‘ سے بات کرتے ہوئے کہا کہ فٹبال کے حقیقی شائقین شمالی امریکا کا سفر کر کے عالمی کپ کو فالو نہیں کر سکتے، فیفا کہتا ہے کہ وہ سب کا استقبال کرتا ہے لیکن حقیقت اس کے برعکس ہے کیوں کہ کوئی بھی یہ مالی اخراجات برداشت نہیں کر سکتا۔ دوسری طرف انگلینڈ فٹ بال سپورٹرز ایسوسی ایشن نے فیفا کو لالچی قرار دیا اور کہا کہ اس نے شائقین سے مالی طور پر زیادہ سے زیادہ فائدہ بٹورنے کے لیے ورلڈ کپ کو محض آمدنی کے حصول کا ایک ذریعہ سمجھ لیا ہے۔ برینٹ فورڈ کے مداح بلی گرانٹ کا کہنا تھا کہ اس بار وہ پہلے کی طرح تمام میچز میں شریک نہیں ہو پائیں گے، کیوں کہ ان کے ساتھ سفر کرنے والے کئی افراد بھاری مالی اخراجات برداشت کرنے سے قاصر ہیں اور بعض نے اسی وجہ سے سفر منسوخ کرنے کا فیصلہ کر لیا ہے۔ یاد رہے کہ فیفا نے گزشتہ ہفتے اعلان کیا تھا کہ اسے اگلے عالمی کپ کے میچوں کے ٹکٹوں کی خریداری کے لیے 5000 درخواستیں موصول ہوئی ہیں اور سرفہرست 10 ممالک میں انگلینڈ اور اسکاٹ لینڈ نمایاں ہیں۔ تاہم شائقین کے لیے فی میچ 430 امریکی ڈالر کی ادائیگی بہت زیادہ سمجھی جا رہی ہے۔

Source: social media