سرینگر میں دھماکوں کی آواز کی خبر سامنے کے آنے کے بعد جنگ بندی کو لے کر تشویش پیدا ہو گئی تھی۔ جموں و کشمیر کے وزیر اعلیٰ عمر عبداللہ نے اس کی خبر شیئر کی تھی۔ تاہم ہندوستانی فوج نے سرینگر میں دھماکوں یا ایل او سی پر فائرنگ کی خبروں کی تردید کی ہے۔ ذرائع کے مطابق فوج نے کہا ہے کہ نظر آنے والے ڈرون نگرانی کے لیے استعمال کیے گئے تھے۔ دریں اثنا پنجاب کے گرداس پور کے ڈی سی نے کہا ہے کہ ہم نے علاقے میں بلیک آؤٹ احتیاطاً کیا تھا اور کوئی بھی گھبرانے کی بات نہیں ہے۔ تازہ اطلاعات کے مطابق جنگ بندی برقرار ہے اور کہیں بھی ڈرون حملہ یا ایل او سی پر فائرنگ نہیں ہوئی ہے۔ جنگ بندی کی خلاف ورزی کے حوالے سے ابھی تک کوئی تھی تصدیق شدہ اطلاع نہیں ہے۔ اس سے قبل جموں و کشمیر کے وزیر اعلیٰ عمر عبداللہ نے سوشل میڈیا پلیٹ فارم ایکس پر سرینگر میں دھماکوں کی خبر دیتے ہوئے لکھا ’’جنگ بندی کا کیا ہوا؟ سرینگر میں دھماکوں کی آوازیں سنی گئیں‘‘۔ انھوں نے ایک ویڈیو شیئر کرتے ہوئے ایک اور پوسٹ میں لکھا ’’کوئی جنگ بندی نہیں ہے۔ سرینگر کے مرکز میں ابھی ایئر ڈیفنس یونٹ نے کام شروع کیا‘‘۔ واضح رہے کہ آج شام وزارت خارجہ کے سکریٹری وکرم مسری اور وزارت دفاع، دونوں کی پریس بریفنگ میں یہ اعلان کیا گیا تھا ہندوستان اور پاکستان نے جنگ بندی پر اتفاق کر لیا ہے اور مزید بات چیت 12 مئی کو متوقع ہے۔

Source: Social media