دربھنگہ، 16 جون :بہار کے مدھوبنی لوک سبھا حلقہ کے رکن پارلیمنٹ اشوک کمار یادو کے لاپتہ بیٹے وبھوتی کمار یادو کو سمری تھانہ علاقہ کے شوبھن سے بحفاظت برآمد کر لیا گیا ہے ۔ سب ڈویژنل پولیس آفیسر (صدر) امت کمار نے آج یہاں بتایا کہ گا[ﺅں والوں سے موصولہ اطلاع پر پولیس نے ایم پی کے بیٹے کو ضلع کے شوبھن کے قریب سے مکمل طور پر محفوظ حالت میں برآمد کیا ہے ۔ انہوں نے کہا کہ ایم پی کے بیٹے وبھوتی جندل گلوبل لائاسکول کے طالب علم ہیں۔ وہ خود وہاں گئے تھے اور کن حالات میں گئے تھے یہ بتانے میں وہ ابھی قاصر ہیں۔ انہیں ابھی آرام کی ضرورت ہے ۔ مقامی لوگوں کی اطلاع پر رکن پارلیمنٹ خود وہاں پہنچے اور وبھوتی یادو کو اپنے ساتھ گھر لے گئے ۔ رکن پارلیمنٹ اشوک کمار یادو نے کہا کہ ان کا بیٹا کمزور دکھائی دے رہا ہے اور اس کے پورے جسم پر مچھر کے کاٹنے کے نشانات ہیں۔ شاید اس نے کل سے کھانا بھی نہیں کھایا۔ رکن پارلیمنٹ نے اپنے بیٹے کے ملنے پر خوشی کا اظہار کیا اور تعاون کے لیے سب کا شکریہ ادا کیا۔قابل ذکر ہے کہ مدھوبنی کے رکن پارلیمنٹ اشوک کمار یادو دربھنگہ شہر کے لہریا سرائے تھانہ علاقے کے بنگالی ٹولہ محلہ میں اپنے آبائی گھر میں رہتے ہیں۔ اتوار کی صبح تقریباً 7 بجے ان کا دوسرا بیٹا وبھوتی یادو گھر سے نکلا اور جب وہ دیر شام تک گھر نہیں لوٹا تو ایم پی نے اپنی سطح پر تلاش کرنے کے بعد لہریا سرائے تھانے میں اپنے بیٹے کی گمشدگی کا معاملہ درج کرایا۔ رکن پارلیمنٹ کا بیٹا اپنا موبائل اور پرس بھی گھر میں چھوڑ گیا تھا جس کی وجہ سے اہل خانہ بھی کافی پریشان تھے ۔ ایم پی اشوک کمار یادو کے تین بیٹے ہیں۔ پہلا بیٹا ڈاکٹر کشتیج کمار یادو ایم بی بی ایس کرنے کے بعد پی جی کی تعلیم حاصل کر رہے ہیں۔ جب کہ دوسرے وبھوتی یادو دہلی کے جندل گلوبل لائکالج سے قانون کی تعلیم حاصل کر رہے تھے ۔ کچھ دنوں سے انہوں نے پڑھائی چھوڑ دی تھی۔جبکہ تیسرا بیٹا دیواشیش یادو بھونیشور میں انجینئرنگ کر رہا ہے ۔

Source: uni news