انفورسمنٹ ڈائریکٹوریٹ (ای ڈی) نے کانگریس ایم پی پرینکا گاندھی واڈرا کے شوہر رابرٹ واڈرا کو تازہ طور پر سمن جاری کیا ہے۔ سرکاری ذرائع نے پیر کو بتایا کہ یہ سمن برطانیہ میں مقیم اسلحہ کنسلٹنٹ سنجے بھنڈاری سے متعلق ایک کیس میں رابرٹ واڈرا کا بیان ریکارڈ کرنے کے لیے جاری کیا گیا ہے۔ سرکاری ذرائع نے بتایا کہ سنجے بھنڈاری نے رابرٹ واڈرا سے کہا کہ وہ 17 جون کو ای ڈی کے سامنے منی لانڈرنگ کیس میں اپنا بیان ریکارڈ کرائیں۔ انہیں 17 جون کو پیش ہونا ضروری ہے۔ رابرٹ واڈرا کو دراصل 10 جون کو ای ڈی کے سامنے پیش ہونا تھا، لیکن 56 سالہ واڈرا یہ کہتے ہوئے غیر حاضر رہے کہ انہیں 9 جون سے فلو جیسی علامات ظاہر ہوئی ہیں اور پروٹوکول کے مطابق ان کا کووڈ ٹیسٹ کیا گیا۔ ان کے وکیل نے کہا کہ واڈرا کا ای ڈی کے سمن سے بچنے کا کوئی ارادہ نہیں ہے اور وہ اس ماہ کے آخر میں یا اس کے بعد کسی بھی وقت ای ڈی کے سامنے پیش ہونے کے لیے تیار ہیں۔ تاہم ایسا لگتا ہے کہ ای ڈی نے رابرٹ واڈرا کو پریوینشن آف منی لانڈرنگ ایکٹ کے تحت اپنا بیان ریکارڈ کرنے اور بعد میں اس معاملے میں چارج شیٹ داخل کرنے کے لیے تازہ سمن جاری کیا ہے۔ رابرٹ واڈرا سے ای ڈی، منی لانڈرنگ سے متعلق 3 معاملات میں تفتیش کر رہی ہے۔ پہلے معاملہ میں ہریانہ میں 2008 کے دوران ایک زمین کے سودے میں بے ضابطگیوں کے الزام کے تحت مقدمہ درج کیا گیا۔ ای ڈی نے اس معاملے میں رابرٹ واڈرا سے 3 دن تک پوچھ گچھ کی تھی۔ دوسرے معاملہ میں راجستھان کے بیکانیر میں ایک زمین کے سودے میں مالی بے ضابطگیوں کے الزامات ہیں۔ ای ڈی اس معاملے میں بھی رابرٹ واڈرا سے بھی تفتیش کررہی ہے۔ 2016 میں انکم ٹیکس ڈپارٹمنٹ نے دہلی میں سنجے بھنڈاری (63) کے مکان پر چھاپہ مارا تھا۔ اس کے فوراً بعد وہ لندن فرار ہو گئے۔ اس ماہ کے شروع میں، بھارتی حکومت نے برطانوی سپریم کورٹ سے اپیل کی تھی کہ اسے بھارت واپس لانے کی اجازت دی جائے۔ تاہم برطانیہ کی عدالت نے اسے مسترد کر دیا۔ اس کے ساتھ بھنڈاری کو ہمارے ملک میں لانے کے امکانات تقریباً ختم ہو گئے ہیں۔ ای ڈی نے 2023 میں چارج شیٹ دائر کرتے ہوئے الزام لگایا کہ رابرٹ واڈرا نے بھنڈاری کی جانب سے 2009 میں خریدے گئے برائنسٹن اسکوائر کی تزئین و آرائش کے لیے فنڈ فراہم کیا۔ تاہم رابرٹ واڈرا کا کہنا ہے کہ ان کے لندن میں براہ راست یا بالواسطہ کوئی اثاثہ نہیں ہے۔ انھوں نے کہا کہ ای ڈی 'سیاسی دباؤ' میں ان کے خلاف مقدمات درج کئے ہیں۔

Source: social media