دوسرا ٹی ٹوئنٹی، جنوبی افریقی کپتان نے شکست کی وجہ بتادی

پاکستان نے دوسرے ٹی 20 میچ میں جنوبی افریقا کو 9 وکٹوں سے شکست دے کر تین میچوں کی سیریز 1-1 سے برابر کردی۔ لاہور کے قذافی اسٹیڈیم میں کھیلے گئے میچ میں پاکستان نے جنوبی افریقا کی جانب سے دیا جانے والا 111 رنز کا ہدف باآسانی ایک وکٹ کے نقصان پر 13.1 اوورز میں حاصل کرلیا۔ میچ کے بعد گفتگو کرتے ہوئے جنوبی افریقی کپتان ڈونوون فریرا نے دوسرے ٹی 20 میں شکست کی وجہ بیٹنگ کی ناکامی کو قرار دیدیا۔ جنوبی افریقی کپتان کا کہنا تھا کہ ٹیم اتنے رنز نہیں بنا سکی کہ بولر دفاع کرسکتے۔ کوشش کریں گے فائنل میں غلطیاں نہ دہرائیں۔ پاکستانی ٹی ٹوئنٹی ٹیم کے کپتان سلمان علی آغا نے کہا کہ پہلے میچ میں جنوبی افریقا نے ہمیں آؤٹ کلاس کیا دوسرے میچ میں حساب چکا دیا۔ میچ کے بعد گفتگو کرتے ہوئے سلمان آغا نے کہا کہ امید ہے فائنل میں بھی مداحوں کو بہترین کھیل دکھائیں گے۔ کپتان نے سلمان مرزا اور صائم ایوب کی تعریف کی کرتے ہوئے کہا کہ صائم ایوب کی کارکردگی سے بہت خوش ہوں جب کہ سلمان مرزا کو سخت محنت کا صلہ مل رہا ہے۔ ابھرتے ہوئے فاسٹ بولر سلمان مرزا نے میچ کے بعد پریس کانفرنس کرتے ہوئے کہا کہ کوچ کے پلان پر عمل کرنے سے بہتری آئی ہے ٹیم میں واپسی پر میچ وننگ پرفارمنس ہو توبہت اچھا لگتا ہے۔ سلمان مرزا کا کہنا تھا کہ آج کی پرفارمنس اپنی والدہ کے نام کرتا ہوں، دو تین گیندیں کرالیں تو اندازہ ہو جاتا ہے کہ پچ کیسی ہے لاہور میں کھیل کر یہاں کی کنڈیشنز بہتر جانتا ہوں۔

Source: social media