ارجن سنگھ کے جلسے میں ترنمول رہنماوں کی شمولیت پر تنازع، احتجاج کرنے والے کوستو کی دو بی جے پی اراکینِ اسمبلی کی حمایت
ترنمول کانگریس کے دو سابق بلدیاتی چیئرمین، اتم داس اور پرشانت چودھری، کو لے کر بیرک پور میں بی جے پی کے اندرونی اختلافات اب کھل کر سامنے آنے لگے ہیں۔ انہیں پارٹی میں شامل کرنے کی مخالفت کرنے والے بیرک پور کے رکنِ اسمبلی کوستھو باگچی کے موقف کی حمایت جگدل کے رکنِ اسمبلی راجیش کمار اور نیاہاٹی کے رکنِ اسمبلی سمترا چٹوپادھیائے نے کی ہے۔ دوسری جانب، بیج پور کے رکنِ اسمبلی سودیپتا داس نے نوپاڑہ کے رکنِ اسمبلی اور ریاستی وزیر ارجن سنگھ کی حمایت کی ہے۔ دونوں سابق بلدیاتی چیئرمینوں کو لے کر شروع ہونے والے تنازع میں اب دونوں گروپوں کا موقف واضح ہو گیا ہے۔
گزشتہ ہفتے ایک ہی اسٹیج پر ارجن سنگھ کے ساتھ بیرک پور میونسپلٹی کے سابق چیئرمین اتم داس کی موجودگی کو لے کر تنازع شروع ہوا تھا۔ اتم داس اور ٹٹاگڑھ کے سابق چیئرمین پرشانت چودھری کے بی جے پی میں شامل ہونے کی صورت میں پارٹی کے ریاستی دفتر کے سامنے خود کو آگ لگا کر خودکشی کرنے کی دھمکی بیرک پور کے نوجوان بی جے پی رکنِ اسمبلی کوستھو باگچی نے دی تھی۔ اس کے 24 گھنٹے کے اندر ہی مقامی بی جے پی قیادت کے ایک حصے نے اتم داس کے گھر جا کر وجے دشمی کی مبارک باد دی۔ اس کے جواب میں پارٹی کے دوسرے گروپ نے ترنمول اور سی پی ایم رہنماو¿ں کے ساتھ کوستھو کی تصاویر سامنے لا کر مہم شروع کر دی۔ ریاستی وزیر اور سابق ریاستی صدر دلیپ گھوش نے بھی کوستھو پر تنقید کی تھی۔
اس صورتِ حال میں جمعرات کو بیرک پور تنظیمی ضلع میں زعفرانی خیمے کے اندرونی سیاسی حالات بالکل واضح ہو گئے۔ ترنمول کے دونوں سابق رہنماو¿ں کے معاملے میں کوستھو کے موقف کی حمایت جگدل کے رکنِ اسمبلی اور سابق آئی پی ایس افسر راجیش کمار نے کی۔ انہوں نے کہا، ”بیرک پور کے رکنِ اسمبلی نے جو کہا، وہ ان کے دل کی بات ہے۔ میں کوستھو کے بیان کی حمایت کرتا ہوں۔“ انہوں نے ایک دوسرے رکنِ اسمبلی کے حلقے میں کسی اور رہنما کی مداخلت پر بھی سوال اٹھایا۔
دوسری جانب، نیاہاٹی کے رکنِ اسمبلی اور بنکم چندر چٹوپادھیائے کے خاندان کے فرد سمترا چٹوپادھیائے نے کہا، ”کوستھو نے یقیناً ثبوت اپنے پاس رکھ کر بات کی ہوگی۔ اس نے پارٹی کے خلاف کوئی بات تو نہیں کہی۔ اس نے صرف خبردار کیا ہے کہ کن لوگوں کو پارٹی میں شامل کرنا چاہیے اور کن کو نہیں۔“
یعنی متنازع رہنماو¿ں کو پارٹی میں شامل کرنے کے معاملے پر کوستھو کے اعتراض کی حمایت میں دو اراکینِ اسمبلی کھڑے ہو گئے ہیں۔ دوسری جانب سودیپتا نے فیس بک پر ایک کھلا خط لکھ کر ارجن سنگھ کی حمایت میں آواز بلند کی ہے۔ ارجن کے سیاسی کردار پر سوال اٹھانے کی مخالفت کرتے ہوئے انہوں نے ماضی کے واقعات کا حوالہ دیا۔ اپنی پوسٹ میں انہوں نے منیش شکلا قتل کیس کا بھی ذکر کیا ہے۔
اس طرح ایک جانب کوستھو کی حمایت میں دو اراکینِ اسمبلی کی کھلی تائید ہے، تو دوسری جانب ارجن سنگھ کے حق میں سودیپتا کا جوابی موقف سامنے آیا ہے۔ دونوں سابق بلدیاتی چیئرمینوں کو بی جے پی میں شامل کرنے کی قیاس آرائیوں سے شروع ہونے والا یہ تنازع اب بیرک پور میں بی جے پی کے اندرونی اقتدار کی کشمکش کی شکل اختیار کرتا جا رہا ہے۔