چوری، افراتفری اور آنسو گیس، ورلڈ کپ افتتاح کے چونکا دینے والے پس پردہ حالات

انگلش صحافی شارلٹ ڈیلی نے امریکہ، کینیڈا اور میکسیکو میں ورلڈ کپ 2026 کی کوریج کے اپنے پہلے دن کے دوران دلچسپ تفصیلات کا انکشاف کردیا۔ انہوں نے کہا ہے کہ وہ چوری کا شکار ہوئیں اور دارالحکومت میکسیکو سٹی میں افتتاحی سٹیڈیم کے باہر ٹرانسپورٹ کی افراتفری اور جھڑپوں کے درمیان پھنس گئیں۔ برطانوی اخبار "ڈیلی میل" میں شائع ہونے والی ایک رپورٹ میں بتایا گیا کہ میکسیکو کے دارالحکومت میں دو ہوٹلوں کے درمیان منتقلی کے دوران دن دیہاڑے ان کا سامان چوری کر لیا گیا جہاں وہ ٹورنامنٹ شروع ہونے سے چند گھنٹے قبل اپنا فون، بینک کارڈز اور ذاتی اشیاء گنوا بیٹھی تھیں۔ انہوں نے مزید کہا کہ انہیں اپنے بینک کارڈز منسوخ کرنے اور پولیس میں رپورٹ درج کرانے پر مجبور ہونا پڑا۔ اس کے بعد انہیں ازٹیکا سٹیڈیم کے راستے میں اس وقت ایک نئے مسئلے کا سامنا کرنا پڑا جب میڈیا کے نمائندوں کے لیے مختص بسوں کے چلنے کے اوقات یا مقامات جاننے میں بڑی تعداد میں صحافی ناکام رہے۔ انہوں نے یہ بھی بتایا کہ ازٹیکا سٹیڈیم جو افتتاح کی ميزبانی کر رہا تھا کا سفر سڑکوں کی بندش اور سکیورٹی چیک پوائنٹس کی وجہ سے دو گھنٹے سے زیادہ وقت لے گیا۔ یہ سب اس کے باوجود ہوا کہ وہ فٹ بال کی عالمی تنظیم "فیفا" کی بس میں سوار تھیں۔ خاتون صحافی نے مزید بتایا: میرا ایک ساتھی جس نے سرکاری ٹرانسپورٹ کو نظر انداز کیا اور اوبر گاڑی لی، وہ صرف 40 منٹ میں پہنچ گیا۔ جبکہ میرے سفر میں دو گھنٹے سے زیادہ کا وقت لگ گیا۔ مظاہرین سٹیڈیم کے باہر جمع ہو گئے تھے تاکہ میکسیکو میں 1 لاکھ 33 ہزار سے زیادہ لاپتہ افراد کے بحران کو اجاگر کریں۔ اساتذہ تنخواہوں اور کام کے حالات کے خلاف احتجاج کر رہے تھے۔ ڈیلی میل نے وضاحت کی کہ مظاہرین نے اندرونی علاقے کی طرف جانے والی سکیورٹی رکاوٹوں کو توڑنے کی کوشش کی، پتھر پھینکے گئے اور پٹاخے چھوڑے گئے۔ ہنگامہ آرائی پر قابو پانے والی پولیس ہجوم کو سٹیڈیم تک پہنچنے سے روکنے کے لیے آگے بڑھی اور جلد ہی جگہ آنسو گیس سے بھر گئی۔ حالات کو بیان کرتے ہوئے خاتون صحافی نے کہا کہ ورلڈ کپ کے افتتاحی دن کو دنیا کے سامنے میزبان ملک کی ایک روشن تصویر پیش کرنا تھی لیکن سٹیڈیم پہنچنے والے بہت سے لوگوں نے خود کو دھوئیں، تشدد اور ہنگاموں کے مناظر کے سامنے پایا۔ جب میں آخر کار میچ دیکھنے کے لیے بیٹھی تو یہ سب خیالی سا لگ رہا تھا کیونکہ صرف 24 گھنٹوں کے دوران چوری ہونے کے بعد میں نے خود کو بغیر فون کے پایا، ٹرانسپورٹ کی افراتفری کے درمیان پھنسی رہی اور ورلڈ کپ کے دروازوں کے باہر شدید جھڑپیں دیکھتی رہی۔

Source: social media