بہار انتخابات پر کانگریس ورکنگ کمیٹی کا اجلاس 24 ستمبر کو پٹنہ میں

نئی دہلی، 17 ستمبر:کانگریس کی اعلیٰ ترین پالیسی ساز باڈی کانگریس ورکنگ کمیٹی (سی ڈبلیو سی) کا توسیعی اجلاس آئندہ ہفتے بہار کی راجدھانی پٹنہ میں ہوگا، جس میں پارٹی کی اعلیٰ قیادت بہار اسمبلی انتخابات پر غور و خوض کرے گی اور مبینہ 'ووٹ چوری' کے مسئلے پر بھارتیہ جنتا پارٹی کو گھیرنے کی حکمت عملی پر تبادلہ خیال کرے گی۔ کانگریس ذرائع نے بتایا کہ پارٹی کے جنرل سکریٹری کے سی وینو گوپال نے ورکنگ کمیٹی کے تمام اراکین کو خط لکھ کر اس توسیعی میٹنگ کی اطلاع دے دی ہے ۔ اجلاس 24 ستمبر کو صبح 10 بجے شروع ہوگا، تاہم مقام کے بارے میں ابھی اعلان نہیں کیا گیا ہے ۔ انہوں نے کمیٹی کے اراکین سے اجلاس میں شرکت کی اپیل کی ہے ۔ بہار اسمبلی انتخابات کے پیشِ نظر سی ڈبلیو سی کا یہ اجلاس نہایت اہم تصور کیا جا رہا ہے ۔ پارٹی صدر ملک ارجن کھڑگے کی صدارت میں ہونے والے اس اجلاس میں ریاستی اسمبلی انتخابات کے حوالے سے پارٹی کی حکمت عملی پر بھی تبادلہ خیال متوقع ہے ۔ اس توسیعی اجلاس میں کانگریس پارلیمانی پارٹی کی لیڈر سونیا گاندھی، جنرل سکریٹری پرینکا گاندھی واڈرا سمیت بڑے لیڈروں کی شرکت کا امکان ہے ۔ اجلاس میں مستقل اور خصوصی مدعو اراکین، پارٹی کے وزرائے اعلیٰ، پردیش کانگریس کمیٹی کے صدور اور کانگریس لیجسلیچر پارٹی کے رہنما بھی شریک ہوں گے ۔ ذرائع کے مطابق اجلاس میں کمیٹی کے 39 اراکین کے علاوہ بہار کے تمام ارکانِ پارلیمان، ایم ایل اے ، ایم ایل سی، کانگریس سکریٹریز، ورکنگ کمیٹی کے اراکین، تنظیموں کے سربراہ اور خصوصی مدعو افراد شامل ہوں گے ۔ ذرائع نے مزید بتایا کہ راہل گاندھی کی 'ووٹر ادھیکار یاترا' نے پارٹی میں زبردست جوش و خروش پیدا کیا ہے ۔ اسی سال کے آخر میں ہونے والے بہار اسمبلی انتخابات کے پیشِ نظر اس اجلاس میں پارٹی کی انتخابی مہم کی حکمت عملی، دیگر ریاستوں کے انتخابات اور مبینہ 'ووٹ چوری' کے مسئلے پر تفصیلی غور کیا جائے گا۔

Source: uni news