ایشان کشن کی طوفانی سنچری اور ارشدیپ کی خطرناک گیندبازی، ہندستان نے 1-4 سے سیریز جیت لی

ترووننت پورم، 31 جنوری:) ایشان کشن (103) کی پہلی شاندار سنچری، کپتان سوریہ کمار یادو (63) اور ہاردک پانڈیا (42) کی دھواں دھار اننگز اور بائیں ہاتھ کے تیز گیند باز ارشدیپ سنگھ (51 رنز دے کر پانچ وکٹیں) کی خطرناک گیند بازی کی بدولت ہندستان نے نیوزی لینڈ کو پانچویں اور آخری ٹی ٹوئنٹی میچ میں ہفتہ کو 46 رن سے شکست دے کر سیریز 4-1 سے اپنے نام کر لی۔ہندستان نے پہلے بلے بازی کرتے ہوئے پانچ وکٹوں پر 271 رن کا بڑا اسکور بنایا، جس کے جواب میں نیوزی لینڈ کی ٹیم 19.4 اوورز میں 225 رن پر سمٹ گئی۔ ارشدیپ اپنے ابتدائی دو اوورز میں مہنگے ثابت ہوئے ، لیکن آخری دو اوورز میں چار وکٹیں لے کر پہلی بار ٹی ٹوئنٹی میں پانچ وکٹوں کا کارنامہ انجام دیا۔ اکشر پٹیل نے 33 رن دے کر تین وکٹیں حاصل کیں، جبکہ ورون چکرورتی اور رنکو سنگھ کو ایک ایک وکٹ ملی۔ ایشان کشن نے 43 گیندوں پر 103 رن کی اننگز کھیلی، جس میں چھ چوکے اور دس چھکے شامل تھے ۔ سوریاکمار یادو نے 30 گیندوں پر 63 رنز بنائے ، جن میں چار چوکے اور چھ چھکے شامل تھے ۔ ہاردک پانڈیا نے 17 گیندوں پر 42 رنز بنائے ، ایک چوکا اور چار چھکے لگائے ۔ شیوم دوبے نے آخری گیند پر چھکا لگا کر اننگز کا اختتام کیا۔ ہندستان کی جانب سے شاندار بلے بازی دیکھنے کو ملی۔ ابھیشیک شرما (30) نے تیز آغاز فراہم کیا، اگرچہ سنجو سیمسن (6) ایک بار پھر سستے میں آ¶ٹ ہو گئے ۔ ابھیشیک نے 16 گیندوں میں چار چوکے اور دو چھکے لگائے ۔ دونوں اوپنرز پاور پلے میں آ¶ٹ ہو گئے ، مگر اس کے باوجود ہندوستانی اننگز کی رفتار میں کمی نہیں آئی۔ اس کے بعد ایشان کشن نے زبردست جوابی حملہ کیا، نیوزی لینڈ کے گیند بازوں کو میدان کے چاروں طرف نشانہ بنایا اور میچ کا رخ ہندستان کی جانب موڑ دیا۔ ابتدا میں سوریاکمار یادو نے ان کا ساتھ دیا، پھر خود بھی جارحانہ انداز میں کھیلتے ہوئے تیزی سے نصف سنچری مکمل کی۔ دونوں کے درمیان 137 رنز کی شراکت اس وقت ٹوٹی جب سینٹنر نے ہندوستانی کپتان کو آ¶ٹ کیا، مگر ایشان نے اپنا حملہ جاری رکھا اور محض 42 گیندوں میں شاندار سنچری مکمل کی۔ بعد میں ہاردک پانڈیا نے آخر میں تیز رفتار اننگز کھیل کر اسکور کو اور بلند کیا۔ ہدف کے تعاقب میں نیوزی لینڈ نے فن ایلن کی 80 رنز کی طوفانی اننگز کی بدولت ایک موقع پر ایک وکٹ پر 117 رنز بنا لیے تھے ، لیکن اس کے بعد وکٹوں کی جھڑی لگ گئی اور 137 رنز تک پہنچتے پہنچتے پانچ وکٹیں گر گئیں۔ اس کے بعد نیوزی لینڈ کی ٹیم واپسی نہ کر سکی اور 225 رن پر ڈھیر ہو گئی۔

Source: UNI NEWS