ایس آئی ٹی نے ونتارا کو دی کلین چٹ، سپریم کورٹ نے رپورٹ قبول کی

نئی دہلی، 15 ستمبر: سپریم کورٹ کی طرف سے تشکیل دی گئی خصوصی تحقیقاتی ٹیم (ایس آئی ٹی) نے جانوروں کی دیکھ بھال میں مبینہ بے ضابطگیوں کے معاملے میں ریلائنس فاونڈیشن کے جنگلی حیات کے بچاو، بحالی اور تحفظ کے مرکز 'ونتارا' کو کلین چٹ دے دی ہے ۔ جسٹس پنکج میتھل اور جسٹس پی بی ورلے کی بنچ نے عدالت عظمیٰ کی طرف سے تشکیل دی گئی تحقیقاتی ٹیم کی رپورٹ کا حوالہ دیتے ہوئے کہا کہ حکام نے ونتارا کیس میں تعمیل اور ضابطہ کار اقدامات کے معاملے پر اطمینان کا اظہار کیا ہے ۔ جانوروں کو گود لینے اور ان کی دیکھ بھال کے معاملے میں قواعد کو نظر انداز کرنے سمیت الزامات میں کوئی بھی سچائی نظر نہیں آتی۔ بنچ نے مزید کہاکہ "عدالت کی طرف سے تشکیل کردہ خصوصی تحقیقاتی ٹیم کو کوئی بے ضابطگی نہیں ملی۔" عدالت نے کہا کہ جانوروں کو گود لینا ریگولیٹری میکانزم کے تحت آتا ہے ۔ سپریم کورٹ کے سابق جج جسٹس جستی چلمیشور کی قیادت والی ایس آئی ٹی نے جمعہ کو اس عدالت میں اپنی رپورٹ پیش کی۔ عدالت نے پیر کو اس رپورٹ کا جائزہ لیا۔ ایس آئی ٹی نے یہ کہتے ہوئے اپنی رپورٹ کا اختتام کیا کہ حصولات ریگولیٹری قوانین کے مطابق تھے اور تمام قانونی تعمیل پر حکام کا اطمینان ریکارڈ کیا گیا۔ سپریم کورٹ نے کہاکہ "ہم نے رپورٹ کا خلاصہ پڑھا ہے ۔ اس میں تعلیمی ریگولیٹری تعمیل کا ذکر ہے ۔ اس میں یہ بھی بتایا گیا ہے کہ متعلقہ فریقوں نے بھی اپنے خیالات پیش کیے ہیں۔ حکام نے ریگولیٹری تعمیل پر اطمینان کا اظہار کیا ہے ۔" بنچ نے مزید کہا کہ وہ ایس آئی ٹی کی "رپورٹ کے مطابق کام کرے گا" اور اشارہ کیا کہ مزید انفرادی شکایات پر غور نہیں کیا جائے گا۔ گجرات حکومت کی طرف سے پیش ہونے والے سالیسٹر جنرل تشار مہتا نے ونتارا کی طرف سے پیش ہونے والے سینئر ایڈوکیٹ ہریش سالوے کی عرضیوں سے اتفاق کیا اور کہا کہ ایس آئی ٹی کی رپورٹ کو عام نہیں کیا جانا چاہئے ۔ انہوں نے واضح کیا کہ رپورٹ ونتارا حکام کے ساتھ شیئر کی جا سکتی ہے تاکہ یہ یقینی بنایا جا سکے کہ وہ ٹیم کی مختلف سفارشات پر عمل کرتے ہیں۔ مسٹر سالوے نے بنچ پر زور دیا کہ وہ اس تنازعہ کو ہمیشہ کے لیے "ختم" کرے ۔ ایس آئی ٹی کی رپورٹ کو عام کیے جانے کی مخالفت کرتے ہوئے انہوں نے کہاکہ "ایک حد تک تجارتی رازداری کو برقرار رکھنا ضروری ہے ۔ یہ سہولت دنیا میں اپنی نوعیت میں سے ایک ہے ۔ ہمیں اس معاملے سے احترام کے ساتھ نمٹنا ہوگا۔" عدالت عظمیٰ نے 25 اگست کو ایڈوکیٹ سی آر جیا سکن اور دیو شرما کی طرف سے دائر عرضی کی سماعت کے بعد ایس آئی ٹی کی تشکیل کا حکم دیا تھا۔ عدالت نے یہ بھی ہدایت دی تھی کہ ایس آئی ٹی کے تین دیگر ممبران جسٹس راگھویندر چوہان (سابق چیف جسٹس اتراکھنڈ اور تلنگانہ ہائی کورٹ)، ہیمنت ناگرالے ، آئی پی ایس (سابق کمشنر آف پولیس، ممبئی)، انیش گپتا، آئی آر ایس (ایڈیشنل کمشنر آف کسٹم) ہوں گے ۔ حکم میں کہا گیا ہے ، "ایس آئی ٹی کو دیگر چیزوں کے ساتھ ساتھ ہندوستان اور بیرون ملک سے جانوروں، خاص طور پر ہاتھیوں کو لانے میں وائلڈ لائف پروٹیکشن ایکٹ اور دیگر متعلقہ قوانین کی دفعات کی تعمیل کی جانچ کرنا ہوگی۔" بنچ نے قبل ازیں 25 اگست کو اپنی سماعت میں کہا تھا کہ درخواست میں بغیر کسی معاون مواد کے صرف الزامات ہیں۔ نیز، اس نے واضح کیا کہ اس طرح کی درخواست کو عام طور پر قبول نہیں کیا جانا چاہئے ۔

Source: uni news