ایران کا سنہ 2026ء ورلڈ کپ سے دستبرداری پر غور

ایرانی فٹ بال فیڈریشن کے صدر مہدی تاج نے واضح کیا ہے کہ امریکہ اور اسرائیل کی جانب سے تہران پر کیے گئے حملوں کے بعد ایران کے لیے امریکہ، کینیڈا اور میکسیکو میں ہونے والے اگلے ورلڈ کپ فائنلز میں شرکت کرنے کا امکان نہیں ہے۔ اسرائیلی فوج کے مطابق امریکہ اور اسرائیل نے ہفتے کے روز ایران پر حملے کیے جبکہ تہران نے میزائلوں سے جواب دیا۔ ان حملوں کے نتیجے میں مشرق وسطیٰ کی متعدد منزلوں کے لیے پروازیں یکے بعد دیگرے منسوخ کر دی گئیں اور خطے میں کئی فضائی حدود بند ہونے کی وجہ سے بہت سی ایئر لائنز نے اپنی پروازیں معطل کر دیں۔ ایران نے سنہ 2026ء ورلڈ کپ کے لیے کوالیفائی کیا ہے اور اسے امریکی سرزمین پر اپنے تین میچ کھیلنے ہیں جن میں 15 جون کو لاس اینجلس میں نیوزی لینڈ کے خلاف، 21 جون کو اسی شہر میں بیلجیم کے خلاف اور آخر میں 26 جون کو سیئٹل میں مصر کے خلاف میچ شامل ہے۔ ہسپانوی اخبار ’مارکا‘ کے مطابق فیڈریشن کے صدر نے ٹورنامنٹ میں ایران کی شرکت پر تبصرہ کرتے ہوئے کہا کہ جو کچھ ہو رہا ہے اور اس امریکی حملے کے بعد، اس بات کا امکان نہیں ہے کہ ہم ورلڈ کپ کی طرف دیکھ سکیں گے، لیکن حتمی فیصلہ کھیلوں کے حکام کو کرنا ہے۔ یاد رہے کہ ایران نے نومبر 2025ء میں واشنگٹن میں ہونے والی ورلڈ کپ کی قرعہ اندازی کے بائیکاٹ کی دھمکی دی تھی جب امریکہ نے اس کے وفد کے کئی ارکان کو ویزے دینے سے انکار کر دیا تھا، بعد میں ایران نے قومی ٹیم کے کوچ امیر قلعہ نوی اور دو دیگر افراد کے ذریعے قرعہ اندازی میں شرکت کا اعلان کیا تھا۔

Source: Social media