ایران کا سعودی عرب پر حملہ، رونالڈو نجی طیارے میں میڈرڈ روانہ

عالمی شہرت یافتہ پرتگالی اسٹار فٹبالر کرسٹیانو رونالڈو کا نجی طیارہ ایرانی حملوں کے بعد سعودی عرب سے میڈرڈ روانہ ہوگیا۔ غیر ملکی میڈیا رپورٹس کے مطابق ریاض میں امریکی سفارت خانے پر حملے کے بعد 41 سالہ رونالڈو کا نجی طیارہ رات 8 بجے ریاض سے روانہ ہوا اور تقریباً 1 بجے میڈرڈ پہنچا۔ فلائٹ ٹریکر کے مطابق طیارہ مصر اور بحیرہ روم کے اوپر سے گزرتے ہوئے اسپین کے دارالحکومت میڈرڈ پہنچا۔ میڈیا رپورٹس کے مطابق سعودی کلب النصر کے اسٹار فٹبالر کے نجی طیارے کی مالیت تقریباً 61 ملین پاؤنڈ بتائی گئی۔ خیال رہے کہ رونالڈو ریاض میں اپنی منگیتر جارجینا روڈریگز اور 5 بچوں کے ساتھ مقیم تھے۔ تاہم یہ تصدیق نہیں ہو سکی کہ خاندان پرواز میں موجود تھا یا نہیں۔ واضح رہے کہ ایرانی سرکاری میڈیا کے مطابق گزشتہ رات کے دوران سعودی عرب میں قائم امریکی سفارتی ہیڈکوارٹر پر 2 ڈرون حملے کیے گئے۔ ایرانی میڈیا کے مطابق بحرین میں بھی ایک عمارت تباہ کر دی گئی ہے۔ دوسری جانب مشرقِ وسطیٰ میں جاری کشیدگی چوتھے روز میں داخل ہو چکی ہے، جس کے باعث سینکڑوں غیر ملکی شہری خطے سے انخلاء کر رہے ہیں۔

Source: social media