ایک فتوے کا مطالبہ بھی پاکستان کے ساتھ مذاکرات میں ناکامی کا سبب بنا: طالبان

طالبان کے نائب وزیر داخلہ رحمۃ اللہ نجیب نے انکشاف کیا کہ استنبول میں افغانستان اور پاکستان کے درمیان مذاکرات اس وقت ختم ہو گئے جب پاکستانی وفد نے تحریک کے رہنما ملا ھبۃ اللہ اخوندزادہ سے پاکستانی حکومت کے خلاف جنگ کے حرام ہونے کا فتویٰ جاری کرنے کو کہا۔ انہوں نے تصدیق کی کہ فتویٰ پر اختلاف ہی بات چیت کو تعطل کا باعث بنا۔ رحمۃ اللہ نجیب نے کابل میں ایک پریس کانفرنس میں وضاحت کی کہ پاکستانی وفد نے طالبان سے مطالبہ کیا کہ وہ پاکستانی حکومت کے خلاف لڑنے کے ’’ حرام ‘‘ ہونے کا فتویٰ جاری کریں۔ انہوں نے مزید کہا کہ میٹنگ کے ثالثوں، یعنی ترکیہ اور قطر، نے اس درخواست کی حمایت کی لیکن وہ دونوں ممالک کے درمیان مسائل کی حساسیت سے پوری طرح واقف نہیں تھے۔ انہوں نے مزید کہا کہ طالبان کے وفد نے جواب دیا کہ فتویٰ جاری کرنا دارالافتا کا واحد استحقاق ہے اور لڑائی کے جائز یا ناجائز ہونے پر بات کرنا حکمرانی کا کوئی حق نہیں ہے۔ انہوں نے زور دے کر کہا کہ فتویٰ جاری کرنا طالبان رہنما کے اختیار میں نہیں ہے۔ انہوں نے مزید کہا کہ افغان فتویٰ کونسل اپنے فیصلوں میں خود مختار ہے اور اپنے احکام شرعی قانون پر قائم کرتی ہے۔ کوئی ادارہ اسے حکم نہیں دے سکتا کہ اسے کیا احکام جاری کرنے چاہییں۔ انہوں نے یہ بھی بتایا کہ پاکستانی فریق کو مطلع کیا گیا تھا کہ فتویٰ کونسل کو فتویٰ کے لیے ایک تحریری درخواست بھیجی گئی ہے اور اس کے جواب کا انتظار کیا جارہا ہے۔ مزید برآں انہوں نے انکشاف کیا کہ پاکستان نے مذاکرات کے دوران پاکستانی طالبان جنگجوؤں اور ان کے خاندانوں کو افغان سرزمین میں منتقل کرنے کی درخواست کی تھی۔ انہوں نے کہا کہ ہم نے ان سے کہا کہ اگر آپ پاکستانی طالبان کا حوالہ دیتے ہوئے ان لوگوں کو درست اور سیاسی طور پر فعال سمجھتے ہیں تو ہم انہیں افغانستان میں مدعو کر سکتے ہیں۔ لیکن اگر آپ انہیں دہشت گرد قرار دیتے ہیں تو آپ کی یہ دلیل مضبوط ہو جائے گی کہ کابل دہشت گردوں کی حمایت کرتا ہے۔ انہوں نے مزید کہا کہ ہمارا پاکستانی عوام یا اس کی حکومت کے حوالے سے کوئی برے ارادہ نہیں ہیں اور ہم نہیں چاہتے کہ موجودہ صورتحال پاکستانی شہریوں کو متاثر کرے۔ انہوں نے کہا پاکستانی طالبان کے ساتھ پاکستان کا مسئلہ 23 سال سے برقرار ہے اور بلوچ علیحدگی پسندوں کے ساتھ 50 سال سے زائد عرصے سے یعنی طالبان کے عروج میں آنے سے بھی پہلے کا ہے۔ انہوں نے واضح کیا کہ قطر اور ترکیہ میں ہونے والے دونوں فریقین کے درمیان ہونے والے مذاکرات کا کوئی نتیجہ نہیں نکلا۔ ساتھ ہی انہوں نے اس بات کی بھی تصدیق کی کہ طالبان حکومت مذاکرات کے ذریعے اختلافات کو حل کرنے کے لیے تیار ہے۔ کابل اور اسلام آباد نے گزشتہ جمعے کو اپنی بات چیت کا آغاز دونوں ملکوں کے درمیان جنگ بندی کو مستحکم کرنے کے مقصد سے کیا تھا۔ اس سے قبل سرحدی جھڑپیں ہوئی تھیں جس کا الزام ایک دوسرے پر عائد کیا گیا تھا۔ ان جھڑپوں میں پانچ افغان جاں بحق ہوگئے تھے۔

Source: social media