ویمنز ورلڈکپ: بنگلادیش کو 10 وکٹوں سے عبرتناک شکست، آسٹریلیا نے سیمی فائنل میں جگہ بنالی

وشاکاپٹنم: آئی سی سی ویمنز ورلڈکپ میں آسٹریلیا نے بنگلہ دیش کو یکطرفہ مقابلے میں شکست دیتے ہوئے سیمی فائنل کےلیے کوالیفائی کرلیا۔ آسٹریلین ویمنز کرکٹ ٹیم نے ورلڈکپ میں تاریخ رقم کرتے ہوئے بنگلادیش کی خواتین کرکٹ ٹیم کو 10 وکٹوں کی عبرتناک شکست سے دوچار کیا، کپتان ایلیسا کی شاندار سنچری کی بدولت آسٹریلیا نے 199 رنز کا ہدف محض 25ویں اوور میں حاصل کیا۔ آسٹریلوی کپتان ایلیسا ہیلی نے آئی سی سی ایونٹ میں لگاتار دوسری سنچری اسکور کی، انھوں نے 77 گیندوں پر 113 رنز کی ناقابل شکست اور انتہائی برقرفتار اننگز تراشی۔ ساتھ اوپنر فیوبےلچ فیلڈ نے ان کا ساتھ دیتے ہوئے 72 گیندوں پر 84 ناٹ آؤٹ کی اننگز کھیلی، تمام بنگلہ دیشی بولرز دونوں کینگرو اوپنرز کے سامنے بےبس نظر آئے۔ اس سے قبل بنگلادیش نے پہلے کھیل کر 9 وکٹوں کے نقصان پر 198 رنز کا ہندسہ اسکوربورڈ پر سجایا، بنگلا ویمن بیٹر سوبھانا موستری نے 80 گیندوں پر 66 رنز کی اننگز کھیلی۔ روبیہ حیدر نے آسٹریلوی بولرز کے سامنے مزاحمت کرتے ہوئے 59 گیندوں پر 44 رنز بنائے، آسٹریلین ویمنز ٹیم کی جانب سے الانا کنگ، جارجیا، انابیل اور گارڈنر نے 2، 2 وکٹیں اپنے نام کیں۔ اس شاندار جیت کے ساتھ ہی آسٹریلیا آئی سی سی ویمنز ورلڈکپ 2025 کے سیمی فائنل کا ٹکٹ کٹوانے والی پہلی ٹیم بن گئی ہے۔

Source: uni news