آندھرا پردیش کے ضلع کاکیناڈا میں واقع ایس کے کالج آف نرسنگ میں موبائل فون گم ہونے کے معمولی تنازع نے شدت اختیار کر لی، جس کے بعد شمال مشرقی (نارتھ ایسٹ) ریاستوں کے طلبہ اور مقامی تلگو بولنے والے طلبہ کے درمیان شدید تصادم ہوا। صورت حال پر قابو پانے کے لیے سینئر حکام نے فوری مداخلت کرتے ہوئے طلبہ کو علیحدہ رہائش گاہوں میں منتقل کر دیا ہے۔
اطلاعات کے مطابق یہ واقعہ 21 اگست کو اس وقت پیش آیا جب شمال مشرقی ریاست سے تعلق رکھنے والے ایک طالب علم کا موبائل فون پراسرار طور پر غائب ہو گیا۔ اس بات پر شروع ہونے والی لفظی تکرار دیکھتے ہی دیکھتے منی پور سمیت دیگر شمال مشرقی ریاستوں کے طلبہ اور مقامی تلگو زبان بولنے والے طلبہ کے درمیان تصادم میں تبدیل ہو گئی۔ تصادم کے دوران بعض طلبہ کے زخمی ہونے کی بھی اطلاعات ہیں۔
کشیدگی کی اطلاع ملتے ہی ڈسٹرکٹ کلکٹر اور ایس پی (سپرنٹنڈنٹ آف پولیس) نے موقع پر پہنچ کر حالات کا جائزہ لیا اور ہاسٹل میں نظم و ضبط بحال کرایا۔
حفاظتی تدابیر کے طور پر شمال مشرقی ریاستوں کے طلبہ کے لیے الگ رہائش کا بندوبست کیا گیا۔ اس کے علاوہ دیگر ریاستوں کے 31 طلبہ کو بھی ان کی رضامندی سے الگ ہاسٹل میں منتقل کیا گیا تاکہ کسی بھی ناخوشگوار واقعے سے بچا جا سکے۔ آندھرا پردیش کے وزیر اعلیٰ این چندرا بابو نائیڈو نے واقعے کا نوٹس لیتے ہوئے اعلیٰ حکام کو تمام طلبہ کی حفاظت یقینی بنانے اور مسئلے کو فوری حل کرنے کی ہدایت دی۔
منی پور کے سابق وزیر اعلیٰ این برین سنگھ نے بھی اس معاملے پر آندھرا پردیش کے وزیراعلیٰ کے دفتر سے رابطہ کیا۔ انہوں نے سوشل میڈیا پلیٹ فارم 'X' پر بتایا کہ طلبہ کو محفوظ عمارت میں منتقل کر دیا گیا ہے اور رات کے وقت ان کی سیکیورٹی کے لیے ایک لیڈی سب انسپکٹر کو بھی تعینات کیا گیا ہے۔ انہوں نے بروقت اقدامات پر چندرا بابو نائیڈو کا شکریہ ادا کیا۔
شمال مشرقی ریاستوں اور بالخصوص منی پور کے طلبہ نے پولیس اور مقامی انتظامیہ کے فوری ردعمل، سیکیورٹی کے انتظامات اور علیحدہ ہاسٹل فراہم کرنے پر اطمینان کا اظہار کرتے ہوئے حکام کا شکریہ ادا کیا ہے۔
وزیراعلیٰ دفتر (CMO) کے مطابق معاملے کو دوستانہ ماحول میں حل کر لیا گیا ہے۔ انتظامیہ کا کہنا ہے کہ اس وقت کالج ہاسٹل میں حالات مکمل طور پر پرامن اور کنٹرول میں ہیں۔

Source: Admin