الکاراز اور جوکووچ کے درمیان ٹینس کی بادشاہت کی جنگ

میلبورن، 30 جنوری: کارلوس الکاراز جمعہ کی دوپہر ڈرامائی انداز میں اپنے پہلے آسٹریلین اوپن فائنل میں پہنچ گئے ۔ انہوں نے جسمانی مسائل پر قابو پاتے ہوئے اور شکست کے دہانے سے شاندار واپسی کرتے ہوئے الیگزینڈر زویریف کو ایک طویل سیمی فائنل میں 6-4، 7-6(5)، 6-7(3)، 6-7(4)، 7-5 سے شکست دی۔ اتوار کو فائنل میں الکاراز کا مقابلہ دس مرتبہ کے چیمپئن نوواک جوکووچ سے ہوگا، جنہوں نے دوسرے سیمی فائنل میں دوسری سیڈ یانک سینر کو پانچ سیٹ کے سنسنی خیز مقابلے میں 3-6، 6-3، 4-6، 6-4، 6-4 سے ہرایا۔ چوتھی سیڈ نوواک جوکووچ نے ایک بار پھر آسٹریلین اوپن میں وقت کو پیچھے چھوڑ دیا۔ انہوں نے سینر کے خلاف پانچ میچوں پر مشتمل شکست کا سلسلہ توڑتے ہوئے شاندار پانچ سیٹ کے مقابلے میں فتح حاصل کی اور ریکارڈ 25ویں گرینڈ سلیم خطاب اور میلبورن میں 11ویں ٹائٹل سے محض ایک جیت دور رہ گئے ۔ پہلا سیٹ ہارنے اور پھر دو سیٹ کے مقابلے ایک سیٹ سے پیچھے ہونے کے بعد، جوکووچ کے لیے حال ہی میں پیش آنے والی جانی پہچانی کہانی کے دہرائے جانے کا خطرہ تھا، کیونکہ وہ 2025 میں چاروں میجرز کے سیمی فائنلز ہار چکے تھے ۔ تاہم اس بار 38 سالہ سربیائی اسٹار نے ہمت نہیں ہاری۔ راڈ لیور ایرینا میں روشنیوں کے نیچے شاندار کھیل پیش کرتے ہوئے انہوں نے خود کو میچ میں واپس کھینچا اور دفاعی چیمپئن سینر کو شکست دے دی۔ یہ 2024 رولان گیروس کے بعد جوکووچ کا پہلا پانچ سیٹ میچ تھا، جب انہوں نے فرانسسکو سیرونڈولو کو ہرایا تھا۔ اتوار کے فائنل میں جوکووچ کا مقابلہ اپنے بڑے حریف کارلوس الکاراز سے ہوگا، جنہوں نے زویریف کے خلاف پانچ گھنٹے 27 منٹ طویل میچ جیت کر میلبورن میں اپنے پہلے چیمپئن شپ مقابلے میں جگہ بنائی-جو ٹورنامنٹ کی تاریخ کا سب سے طویل سیمی فائنل تھا۔ جوکووچ نے 2023 یو ایس اوپن کے بعد کوئی میجر ٹرافی نہیں جیتی، جبکہ سینر اور الکاراز کے غلبے نے اس وقفے کو مزید نمایاں کیا ہے -دونوں نے مل کر گزشتہ آٹھ میجر ٹائٹلز تقسیم کیے ہیں۔ تاہم جمعہ کو جوکووچ نے اس رجحان کو توڑتے ہوئے سینر کو فائنل میں پہنچنے سے روکا۔ اتوار کے فائنل میں جوکووچ الکاراز کے خلاف ہیڈ ٹو ہیڈ میں 5-4 کی معمولی برتری کے ساتھ اتریں گے ۔ بارہ ماہ قبل میلبورن میں کوارٹر فائنل میں انہوں نے اسپین کے اسٹار کو شکست دی تھی۔ سینر کے خلاف جارحانہ اور پراعتماد کارکردگی کے بعد، اور نسبتاً کم کورٹ ٹائم گزارنے کے باعث، جوکووچ ٹائٹل میچ میں زیادہ تازہ دکھائی دیں گے ۔ اے ٹی پی رینکنگ کے نمبر ایک، الکاراز نے عالمی نمبر تین زویریف کو 6-4، 7-6(5)، 6-7(3)، 6-7(4)، 7-5 سے ہرایا۔ دائیں ٹانگ کے اوپری حصے میں تکلیف کے باوجود انہوں نے فیصلہ کن سیٹ میں 3-5 سے پیچھے ہونے کے بعد زبردست واپسی کی اور میلبورن میں اپنا پہلا فائنل یقینی بنایا۔ میچ کے بعد الکاراز نے کہا:"ہمیشہ خود پر یقین رکھنا ضروری ہے ۔ مشکل حالات میں بھی اپنے آپ پر بھروسہ رکھیں۔ جسمانی طور پر یہ میرے کیریئر کے مشکل ترین میچوں میں سے ایک تھا۔" اس فتح کے ساتھ الکاراز کیریئر گرینڈ سلیم مکمل کرنے والے سب سے کم عمر کھلاڑی بننے سے صرف ایک جیت دور ہیں۔ اگر وہ اتوار کو جوکووچ کو ہرا دیتے ہیں تو یہ ریکارڈ اپنے ہم وطن رافیل نڈال سے چھین لیں گے ۔ الکاراز، جنہوں نے میلبورن میں اپنے ابتدائی پانچ میچوں میں ایک بھی سیٹ نہیں گنوایا تھا، زویریف کے خلاف دو سیٹ کی برتری کے بعد بھی آزمائش سے گزرے ۔ تیسرے سیٹ کے دوران انجری کے باعث رفتار کم ہوئی، مگر فیصلہ کن لمحات میں انہوں نے مسلسل چار گیم جیت کر ناقابلِ یقین واپسی مکمل کی اور چاروں گرینڈ سلیم فائنلز میں پہنچنے والے سب سے کم عمر کھلاڑی بن گئے ۔

Source: UNI NEWS