اکاؤنٹ کی معطلی پر تصفیہ، یو ٹیوب کا ڈونلڈ ٹرمپ کو 2 کروڑ 20 لاکھ ڈالر ادا کرنے پر رضامند

مشہور ویڈیو شیئرنگ ایپلی کیشن یو ٹیوب اور امریکی صدر ڈونلڈ ٹرمپ کے درمیان 2021 میں پیدا ہونے والے تنازعے پر تصفیہ ہو گیا ہے جس کے نتیجے میں ویڈیو پلیٹ فارم انہیں 2 کروڑ 20 لاکھ ڈالر ادا کرے گا۔ فرانسیسی خبر رساں ایجنسی اے ایف پی کے مطابق 6 جنوری 2021 کو کیپیٹل ہل پر حملے کے بعد یو ٹیوب نے ڈونلڈ ٹرمپ کا اکاؤنٹ معطل کردیا تھا۔ اس وقت یوٹیوب نے موقف اختیار کیا تھا کہ ’ڈونلڈ ٹرمپ کی ویڈیوز سے تشدد کو مزید ہوا مل سکتی ہے جس کے باعث اُن کا اکاؤنٹ معطل کیا گیا ہے۔‘ آن لائن ویڈیو پلیٹ فارم ’گوگل‘ کی پیرنٹ کمپنی ’الفابیٹ‘ کا ایک ذیلی ادارہ ہے۔ ڈونلڈ ٹرمپ نے اپنا اکاؤنٹ معطل ہونے کے بعد یو ٹیوب کے خلاف قانونی مقدمات درج کرائے تھے۔ کیلیفورنیا کی وفاقی عدالت میں جمع ہونے والی دستاویزات کے مطابق یوٹیوب کی جانب سے ملنے والی رقم میں سے 2 کروڑ 20 لاکھ ڈالر وائٹ ہاؤس میں ایک نئے غیر منافع بخش بال رُوم کی تعمیر کے لیے استعمال ہوں گے۔ جنوری میں میٹا نے 2 کروڑ 50 لاکھ ڈالر اور فروری میں ’ایکس‘ نے ایک کروڑ ڈالر ادا کر کے صدر ٹرمپ اسی نوعیت کے مقدمات کا تصفیہ کیا تھا۔ میٹا کے تصفیے کے تحت 2 کروڑ ڈالر 20 لاکھ ڈالر کی رقم ڈونلڈ ٹرمپ کی فلوریڈا میں مجوزہ صدارتی لائبریری کے لیے مختص کیے گئے ہیں۔ یاد رہے کہ ریپبلکن امیدوار ڈونلڈ ٹرمپ نے 2020 کے صدارتی انتخابات کے نتائج تسلیم کرنے سے انکار کرتے ہوئے احتجاج کا اعلان کیا تھا۔ کیپیٹل ہِل واشنگٹن میں جنوری 2021 کو ہونے والے احتجاج کے دوران ریپبلکن پارٹی کے حامیوں کے ساتھ جھڑپوں میں 140 پولیس افسران اور اہلکار زخمی ہو گئے تھے۔

Source: Social media