اگر ٹیم کے لیے سود مند ہوا تو ورلڈ کپ 2027 کھیلنے پر غور کر سکتا ہوں: وراٹ کوہلی

وراٹ کوہلی نے کہا ہے کہ اگر وہ اب بھی ٹیم کے لیے سود مند ہوسکتے ہیں تو وہ 2027 کے ون ڈے کرکٹ ورلڈ کپ میں کھیلنے پر غور کریں گے۔ انڈیا کے مایہ ناز بلے باز ویراٹ کوہلی نے جمعہ کے روز جاری ہونے والے ایک پوڈکاسٹ میں کہا کہ اگر وہ ٹیم کے ماحول میں مثبت کردار ادا کر سکتے ہیں تو وہ 2027 کے عالمی کپ میں شرکت کے لیے دستیاب ہوں گے۔ 37 سالہ کوہلی کو اپنے دور کے عظیم ترین بلے بازوں میں شمار کیا جاتا ہے اور وہ کروڑوں انڈین شائقین کے ہیرو ہیں۔ اپنی آئی پی ایل فرنچائز رائل چیلنجر بنگلورو کے پوڈکاسٹ میں گفتگو کرتے ہوئے انہوں نے کہا کہ ’اگر میں اُس ماحول کے لیے فائدہ مند ثابت ہو سکتا ہوں جس کا میں حصہ ہوں، اور ٹیم کو بھی محسوس ہو کہ میں قدر میں اضافہ کر سکتا ہوں، تو پھر میں نظر آؤں گا۔‘ انہوں نے مزید کہا کہ ’اگر مجھے یہ محسوس کروایا جائے کہ مجھے اپنی اہمیت اور قابلیت ثابت کرنا ہے، تو پھر میں اُس ذہنی کیفیت میں نہیں ہوں۔‘ وراٹ کوہلی اس وقت انڈیا کی طرف سے صرف ون ڈے کھیلتے ہیں اور بین الاقوامی کرکٹ میں سب سے زیادہ رنز بنانے والوں میں دوسرے نمبر پر ہیں۔ تاہم اس سال انڈین کرکٹ بورڈ نے ان کا سینٹرل کنٹریکٹ میں تنزلی کر دی تھی۔ وراٹ کوہلی نے کہا کہ ’میں کرکٹ کھیلنا چاہتا ہوں اور کھیلتا رہنا چاہتا ہوں۔ انڈیا کے لیے ورلڈ کپ کھیلنا ایک شاندار احساس ہے۔‘ وراٹ کوہلی نے اس ہفتے انڈین پریمیئر لیگ میں مسلسل دو صفر کے بعد ناقابلِ شکست 105 رنز بنا کر دفاعی چیمپئن رائل چیلنجرز بنگلورو کو اہم فتح دلائی۔ یہ آئی پی ایل میں ان کی نویں سینچری تھی، تاہم اس سیزن کی پہلی سینچری تھی۔ وراٹ کوہلی نے 2025 میں ٹیسٹ کرکٹ سے ریٹائرمنٹ کا اعلان کیا تھا۔ اس سے قبل وہ 2024 کے ٹی20 ورلڈ کپ میں انڈیا کی فتح کے بعد ٹی20 انٹرنیشنل کرکٹ سے بھی کنارہ کش ہو گئے تھے، جبکہ کچھ عرصے سے ان کی فارم بھی متاثر رہی تھی۔

Source: social media