افغانستان کے خلاف واحد ٹیسٹ اور 3 میچوں کی ونڈے سیریز کے لیے ہندستانی ٹیم کا اعلان، ایشان کشن کی واپسی

افغانستان کے خلاف ایک ٹیسٹ میچ اور ونڈے سیریز کے لیے ہندوستانی ٹیم کا اعلان ہو گیا ہے۔ ٹیسٹ میچ کے لیے ایک بڑی تبدیلی ٹیم کی نائب کپتانی میں ہوئی ہے۔ تمام قیاس آرائیوں پر مہر لگاتے ہوئے سلیکشن کمیٹی نے رشبھ پنت کو نائب کپتانی سے ہٹا دیا ہے اور ان کی جگہ کے ایل راہل کو یہ ذمہ داری دی ہے۔ جبکہ اسٹار تیز گیند باز جسپریت بمراہ کو پوری سیریز سے ہی آرام دے دیا گیا ہے۔ ان کے علاوہ ایک بڑا فیصلہ تجربہ کار آل راؤنڈر رویندر جڈیجہ کے بارے میں لیا گیا ہے، جو دونوں سیریز کا حصہ نہیں ہیں۔ جبکہ روہت شرما اور ہاردک پانڈیا کے ونڈے سیریز میں کھیلنے پر شک برقرار ہے۔ منگل 19 مئی کو گواہاٹی میں ہندوستانی ٹیم کی سلیکشن کمیٹی کی میٹنگ ہوئی، جس کے بعد چیف سلیکٹر اجیت اگرکر نے پریس کانفرنس میں ٹیم کا اعلان کیا۔ اس میں بڑا فیصلہ رشبھ پنت کے بارے میں ہوا، جنہیں گزشتہ سال ہی ٹیسٹ ٹیم کا نائب کپتان بنایا گیا تھا۔ لیکن بطور کپتان آئی پی ایل میں ان کی قیادت اور اس سے ان کی بیٹنگ پر پڑنے والے اثرات کو دیکھتے ہوئے یہ ذمہ داری واپس لے لی گئی اور تجربہ کار اوپنر راہل کو نائب کپتان بنایا گیا ہے۔ خراب فارم کے باعث رشبھ پنت ٹی-20 کے بعد ونڈے ٹیم سے بھی پوری طرح باہر ہو گئے ہیں۔ ان کی جگہ ایشان کشن کو شاندار کارکردگی کا انعام ملا ہے۔ ایشان کشن کی پورے ڈھائی سال بعد ونڈے ٹیم میں واپسی ہوئی ہے۔ انہوں نے آخری ونڈے میچ ورلڈ کپ 2023 میں کھیلا تھا۔ اس کے ساتھ ہی سنجو سیمسن کی ونڈے میں واپسی کی امیدوں کو جھٹکا لگا ہے۔ حالانکہ ٹیسٹ ٹیم میں اب بھی رشبھ پنت نمبر ون وکٹ کیپر ہیں، جبکہ ان کے بیک اپ کے طور پر دھرو جوریل اسکواڈ میں شامل ہیں۔ ایسے میں ایشان کو ٹیسٹ میں واپسی کے لیے انتظار کرنا ہوگا۔ سلیکشن کمیٹی نے ونڈے سیریز کے لیے ایک بڑا فیصلہ کیا ہے، جس میں روہت شرما اور ہاردک پانڈیا کو شامل کیا گیا ہے۔ حالانکہ دونوں کے بارے میں ہی سلیکشن کمیٹی نے صاف کیا ہے کہ ان کا کھیلنا فٹنس پر منحصر رہے گا۔ دونوں ہی اسٹار کھلاڑی آئی پی ایل 2026 میں فٹنس کے مسائل سے پریشان ہیں۔ اس بات کو مدنظر رکھتے ہوئے ہی یہ فیصلہ لیا گیا ہے۔ دوسری جانب رویندر جڈیجہ کو 6 جون سے شروع ہو رہے ٹیسٹ میچ کے لیے آرام دیا گیا ہے۔ لیکن اگرکر نے صاف کیا ہے کہ ونڈے میں جڈیجہ کی جگہ نئے کھلاڑیوں کو آزمانے کی کوشش ہو رہی ہے اور اس لیے انہیں ونڈے ٹیم سے باہر رکھا گیا ہے۔ ٹیسٹ اور ونڈے سیریز کی ٹیم میں پہلی بار گرنور برار، ہرش دوبے اور پرنس یادو کو منتخب کیا گیا ہے۔

Source: social media