زوبین گرگ کی موت کا معاملہ: مرکزی حکومت نے سنگاپور کو باہمی قانونی معاونت کی درخواست دی

گوہاٹی، 30 ستمبر: مشہور گلوکار اور موسیقار زوبین گرگ کی موت سے متعلق معاملے میں آسام حکومت کی درخواست کے کچھ دن بعد، مرکزی حکومت نے سنگاپور کے حکام کو باہمی قانونی معاونت (ایم ایل اے) کے لیے باضابطہ درخواست بھیجی ہے، سنگاپور میں ایک کشتی کی سیر کے دوران زوبین گرگ کا 19 ستمبر کو انتقال ہو گیا تھا۔ آسام کے وزیر اعلیٰ ہمنت بسوا شرما نے منگل کے روز بتایا کہ وزارت داخلہ نے یہ خط سنگاپور میں ہندوستانی ہائی کمیشن کے فرسٹ سکریٹری ٹی. پربھاکر کو بھیجا ہے، جس میں درخواست کی گئی ہے کہ اسے سنگاپور کے اٹارنی جنرل کو بھیجا جائے۔ خط میں سنگاپور میں ہندوستانی ہائی کمیشن سے یہ بھی درخواست کی گئی ہے، کہ وہ سنگاپور کے حکام کی جانب سے ملنے والے جواب سے وزارت کو آگاہ کرے۔ واضح رہے کہ سنگاپور پوسٹ مارٹم رپورٹ میں موت کی وجہ ڈوبنا بتائی گئی ہے، لیکن زوبین کے لاکھوں مداحوں اور ان کے اہل خانہ نے لاپروائی کو موت کی ممکنہ وجہ قرار دیا ہے۔ ان الزامات کے پیش نظر آسام حکومت نے سی بی آئی جانچ اور ایک خصوصی تحقیقاتی ٹیم (ایس آئی ٹی) تشکیل دی ہے، تاکہ ان کی موت کی وجوہات کی جانچ کی جا سکے۔ آسام حکومت نے ایف آئی آر میں نامزد شیامکانو مہنت اور سدھارتھ شرما کے خلاف لک آؤٹ نوٹس بھی جاری کیا ہے، تاکہ وہ ملک چھوڑ کر فرار نہ ہو سکیں۔

Source: uni urdu news service