زمبابوے کی بنگلہ دیش پر یادگار فتح؛ سیریز میں 0-1 کی برتری

ہرارے ، 6 جولائی:کپتان رچرڈ نگاراوا اور بریڈ ایونز کی تین، تین وکٹوں کی شاندار بولنگ کی بدولت زمبابوے نے پہلے ایک روزہ بین الاقوامی میچ میں بنگلہ دیش کو 25 رنز سے شکست دے کر تین میچوں کی سیریز میں 1-0 کی برتری حاصل کر لی۔زمبابوے کی پوری ٹیم 36.4 اوورز میں 141 رنز پر آ¶ٹ ہوگئی، جس کے جواب میں بنگلہ دیش کی ٹیم 33.1 اوورز میں 116 رنز بنا کر ڈھیر ہوگئی۔ آل را¶نڈر نیومین نیامہوری کو 33 رنز کی اہم اننگز کھیلنے اور 22 رنز دے کر دو وکٹیں حاصل کرنے پر پلیئر آف دی میچ قرار دیا گیا۔ کم اسکور والے اس سنسنی خیز مقابلے میں زمبابوے نے شاندار بولنگ اور عمدہ فیلڈنگ کا مظاہرہ کرتے ہوئے ناممکن دکھائی دینے والی کامیابی اپنے نام کی۔ ایک مرحلے پر ایسا محسوس ہو رہا تھا کہ بنگلہ دیش آسانی سے ہدف حاصل کر لے گا، لیکن میزبان ٹیم نے غیر معمولی جذبے اور نظم و ضبط کا مظاہرہ کرتے ہوئے میچ کا پانسہ پلٹ دیا۔ زمبابوے کی اننگز میں نویں وکٹ کے لیے نیومین نیامہوری اور کپتان رچرڈ نگاراوا کے درمیان 63 رنز کی قیمتی شراکت نے ٹیم کو ایک قابلِ دفاع مجموعہ فراہم کیا، جو بعد میں فیصلہ کن ثابت ہوا۔ ہدف کے تعاقب میں بنگلہ دیش کا آغاز انتہائی مایوس کن رہا۔ بلیسنگ مزاربانی اور رچرڈ نگاراوا نے نئی گیند سے تباہ کن اسپیل کرتے ہوئے ابتدائی پانچ اوورز میں ہی مہمان ٹیم کی ٹاپ آرڈر بیٹنگ لائن کو تہس نہس کر دیا۔بعد ازاں توحید ہردوئے اور نور الحسن، جنہیں بیٹنگ آرڈر میں اوپر بھیجا گیا تھا، نے ذمہ دارانہ کھیل پیش کرتے ہوئے پانچویں وکٹ کے لیے 49 رنز کی شراکت قائم کی، جس سے بنگلہ دیش کی امیدیں دوبارہ روشن ہوئیں۔ تاہم ہردوئے کے آ¶ٹ ہوتے ہی میچ کا رخ ایک بار پھر زمبابوے کی جانب مڑ گیا، جس کے بعد میزبان بولرز نے باقی بیٹنگ لائن کو زیادہ دیر کریز پر ٹھہرنے کا موقع نہیں دیا اور اپنی ٹیم کو یادگار فتح دلائی۔

Source: UNI NEWS