برطانوی بحری تجارتی آپریشنز مرکز کے مطابق منگل کے روز یمن کے ساحلی شہر الحدیدہ سے تقریباً 51 سمندری میل مغرب میں ایک تجارتی جہاز کو پانچ میزائلوں سے نشانہ بنایا گیا، جس کے نتیجے میں جہاز کو شدید نقصان پہنچا اور وہ اپنی حرکت کی مکمل صلاحیت کھو بیٹھا۔ مرکز کا کہنا ہے کہ حملہ اب بھی جاری ہے جبکہ متعلقہ حکام نے واقعے کی تحقیقات کا آغاز کر دیا ہے۔ برطانوی سمندری سکیورٹی کمپنی "امبری" نے صبح کے وقت ایک رپورٹ میں بتایا کہ انہیں ایسی تصاویر موصول ہوئی ہیں جن سے ظاہر ہوتا ہے کہ اسرائیلی فضائی حملوں کے باعث الحدیدہ بندرگاہ کے سیمنٹ سے بنے بعض پلیٹ فارم بری طرح متاثر ہوئے ہیں۔ امبری کا کہنا ہے کہ بارباڈوس کے پرچم بردار دو تجارتی جہاز بھی حملے کی زد میں آ کر متاثر ہوئے، تاہم خوش قسمتی سے دونوں کا عملہ محفوظ رہے۔ ادھر اسرائیلی فوج نے پیر کی صبح اعلان کیا کہ اس نے یمن کے تین مختلف بندرگاہوں اور ایک پاور اسٹیشن پر حوثیوں کے اہداف کو نشانہ بنایا۔ یہ تقریباً ایک ماہ بعد یمن میں اسرائیل کا پہلا حملہ ہے۔ پیر کے روز ایک اور واقعے میں یمن کے جنوب مغربی ساحل سے 50 میل دور ایک یونانی کمپنی کے زیرانتظام تجارتی جہاز پر ڈرون حملے میں عملے کے دو افراد زخمی جبکہ دو لاپتا ہو گئے۔ اس واقعے سے چند گھنٹے قبل حوثی ملیشیا نے سرکاری طور پر ایک مال بردار جہاز پر حملے کی ذمہ داری قبول کرتے ہوئے اسے ڈبونے کا دعویٰ کیا تھا۔

Source: social media