نام ووٹر فہرست سے خارج ہونے کے بعد کون سے ووٹر دوبارہ نام درج کرانے کے لیے درخواست دے سکتے ہیں؟ الیکشن کمیشن نے جاری کیا نوٹیفکیشن
مرنے والے، منتقل ہو جانے والے اور ڈپلیکیٹ فہرست میں شامل ہونے کی وجہ سے نام خارج کیے گئے ووٹر بھی دوبارہ اپنا نام درج کرانے کے لیے درخواست دے سکتے ہیں۔ مغربی بنگال کے چیف الیکٹورل آفیسر کے دفتر کی جانب سے ایک نوٹیفکیشن جاری کیا گیا ہے۔ اس میں بتایا گیا ہے کہ خارج کیے گئے مذکورہ ووٹر آن لائن یا بی ایل او کے ذریعے فارم 6 جمع کرا سکتے ہیں۔ اس سلسلے میں معلومات ڈسٹرکٹ الیکٹورل آفیسر (ڈی ای او) کی ویب سائٹ پر دستیاب ہوں گی۔
منگل کو جاری کیے گئے نوٹیفکیشن میں بتایا گیا ہے کہ 18 سال کی عمر مکمل ہونے کے بعد نئے ووٹر فارم 6 بھر کر اپنا نام درج کرا سکتے ہیں۔ یہ درخواست آن لائن یا براہِ راست بی ایل او کے ذریعے دی جا سکتی ہے۔ جن ووٹروں کے نام مردہ، منتقل شدہ یا ڈپلیکیٹ فہرست میں شامل ہونے کی وجہ سے خارج کیے گئے ہیں، وہ بھی دوبارہ نام درج کرانے کے لیے درخواست دے سکتے ہیں۔
چیف الیکشن کمشنر گیانیش کمار کو لے کر جاری تنازع کے درمیان، جن ریاستوں میں ایس آئی آر مکمل ہو چکا ہے، وہاں فارم 6 میں تبدیلی پہلے ہی منسوخ کی جا چکی تھی۔ اب الیکشن کمیشن نے مختلف ریاستوں اور مرکز کے زیر انتظام علاقوں کے بوتھ لیول افسران (بی ایل او) کو پرانی اور نئی ووٹر فہرستوں کا موازنہ کرکے خارج کیے گئے اہل ووٹروں کی شناخت کرنے اور ان کے نام دوبارہ درج کرنے کی ہدایت دی ہے۔
کمیشن کی حالیہ ہدایات میں خارج کیے گئے اہل ووٹروں کے نام فہرست میں شامل کرنے کے مقصد سے ’وسیع اور خصوصی مہم‘ شروع کرنے کی بات کہی گئی ہے۔ ایس آئی آر کا مرحلہ مکمل کر چکی 20 ریاستوں اور مرکز کے زیر انتظام علاقوں کے بی ایل اوز کو کمیشن کی جانب سے ہدایت دی گئی ہے کہ آئندہ ایک ماہ تک ہر ہفتے کم از کم 20 سے 25 ایسے ووٹروں سے رابطہ کریں جن کے نام فہرست سے خارج ہو گئے ہیں۔
قابل ذکر ہے کہ ’دی انڈین ایکسپریس‘ کی حالیہ رپورٹ میں کہا گیا ہے کہ ایس آئی آر کے تحت 30 ریاستوں اور مرکز کے زیر انتظام علاقوں کی مسودہ ووٹر فہرست سے 13 کروڑ سے زیادہ نام خارج کیے گئے ہیں۔ یہ نام کس طرح خارج کیے گئے، اس کی تحقیقات کے لیے خصوصی تفتیشی ٹیم (ایس آئی ٹی) تشکیل دینے کی درخواست کے ساتھ سپریم کورٹ میں پہلے ہی مقدمہ دائر کیا جا چکا ہے۔اس تنازع کی صورتحال کے درمیان اب الیکشن کمیشن نے مختلف ریاستوں اور مرکز کے زیر انتظام علاقوں کے چیف الیکٹورل افسران (سی ای او) کو ہدایات بھیج کر بی ایل اوز کے لیے ’کیا کرنا ہے‘ اس کا طریقہ کار طے کر دیا ہے۔