ریجی نگر اور نندی گرام ضمنی انتخابات میں ووٹروں کی انگلیوں پر سیاہی لگائی گئی، مگر ’ووٹ ڈالنے کی اجازت نہیں دی گئی‘
صاحب شیخ بیل ڈانگا کے ریجیناگر میں مرزا پور کھگروپارا پرائمری اسکول پہنچے تاکہ ووٹ ڈال سکیں، لیکن الزام ہے کہ مرکزی فورسز نے انہیں یہ کہہ کر واپس جانے کو کہا کہ ان کا ووٹ پہلے ہی ڈالا جا چکا ہے۔
کھگروپارا کے رہنے والے رمضان شیخ کو اسی پولنگ اسٹیشن میں داخل ہونے دیا گیا اور ان کی انگلی پر ناقابلِ مٹائی سیاہی بھی لگائی گئی، لیکن انہیں ای وی ایم کے کیوبیکل میں داخل ہوکر ووٹ ڈالنے سے روک دیا گیا اور کہا گیا کہ ان کا ووٹ پہلے ہی ڈالا جا چکا ہے۔
نندی گرام کے ہری پور گاو¿ں کے انوپ کمار پال نے الزام عائد کیا کہ پیر کی رات بی جے پی کے حامی پولیس کے ساتھ ان کے گھر آئے اور انہیں اور ان کے اہل خانہ کو پولنگ اسٹیشن سے دور رہنے کی ہدایت دی۔نندی گرام کے بھیکوٹیا میں پولنگ اسٹیشن نمبر 28 پر مہیمہ بی بی کی انگلی پر سیاہی لگائی گئی، لیکن انہیں ووٹ ڈالنے کی اجازت نہیں دی گئی۔
منگل کو ریجیناگر اور نندی گرام میں ہونے والے ضمنی انتخابات میں بدعنوانی اور بے ضابطگیوں کے الزامات سامنے آئے۔ یہ انتخابات گیانیش کمار کی قیادت والے الیکشن کمیشن کی جانب سے بنگال میں ”آزادانہ، منصفانہ اور پ±رامن“ انتخابات کرانے پر فخر ظاہر کیے جانے کے محض چار ماہ بعد ہوئے ہیں۔اپوزیشن نے بی جے پی حکومت پر پولیس اور مرکزی فورسز کا ”غلط استعمال“ کرنے کا الزام عائد کیا۔
مرشدآباد کے مسلم اکثریتی علاقوں میں، خاص طور پر ریجیناگر میں، سنگین بے ضابطگیوں کی متعدد شکایات سامنے آئیں۔ بھاگیرتھی دریا اس حلقے کو دو الگ جغرافیائی اور آبادیاتی حصوں میں تقسیم کرتا ہے۔ مشرقی کنارے پر ریجیناگر اور بیل ڈانگا تھانوں کے تحت آنے والی نو پنچایتوں میں مسلم آبادی زیادہ ہے، جبکہ مغربی کنارے پر شکتی پور تھانے کے تحت آنے والی پانچ پنچایتوں میں ہندو آبادی اکثریت میں ہے۔ ریجیناگر کے کل ووٹروں میں مسلمانوں کی تعداد تقریباً 65 فیصد ہے۔کئی ووٹروں نے دعویٰ کیا کہ انہیں مرزا پور کھگروپارا پرائمری اسکول کے پولنگ اسٹیشن نمبر 85 اور 86 میں داخل ہونے سے روک دیا گیا اور بتایا گیا کہ ان کے ووٹ پہلے ہی ڈالے جا چکے ہیں۔ووٹر غلام شیخ نے الزام عائد کیا کہ تاکی پور پرائمری اسکول کے پولنگ اسٹیشن نمبر 9 اور 10 میں صرف بی جے پی اور آر ایس ایس کے کارکنوں کو داخل ہونے کی اجازت دی گئی۔انہوں نے کہا، ”بی جے پی اور آر ایس ایس کے کارکنوں نے ہماری طرف سے ووٹ ڈال دیا۔ پولیس نے مجھے بتایا کہ میرا ووٹ پہلے ہی ڈالا جا چکا ہے اور مجھے گھر واپس جانے کو کہا۔“
سی پی ایم امیدوار محمد سعید کے انتخابی ایجنٹ سناتن ہالدار نے کہا کہ انہیں سومپارا کے پولنگ اسٹیشن نمبر 170 میں داخل ہونے کی اجازت نہیں دی گئی۔
ہالدار نے الزام لگایا، ”میں نے خود کو سی پی ایم امیدوار کا انتخابی ایجنٹ بتایا، اس کے باوجود پولیس اہلکاروں نے زبردستی میرا شناختی کارڈ لے لیا اور اسے جعلی قرار دے کر پھاڑ دیا۔ اگر کسی امیدوار کے انتخابی ایجنٹ کو ووٹ ڈالنے کی اجازت نہیں دی جا رہی تو عام ووٹروں کو کن حالات کا سامنا کرنا پڑا ہوگا، یہ بتانے کی ضرورت نہیں۔“
عام جنتا اونّین پارٹی کے رکن اسمبلی ہمایوں کبیر، جنہیں اپنی پارٹی کے دفتر کے باہر پولیس کے ساتھ تلخ کلامی کے بعد گرفتار کر لیا گیا تھا، نے کہا کہ ”صبح سے ہی ووٹ لوٹے جا رہے تھے۔“کبیر نے کہا، ”ریجیناگر میں ووٹوں کی لوٹ ہو رہی ہے۔ جمہوریت کا قتل کیا جا رہا ہے۔“ ان کے بیٹے غلام نبی آزاد اس نشست سے انتخاب لڑ رہے ہیں جو ان کے والد کے استعفے کے بعد خالی ہوئی تھی۔کانگریس امیدوار عبداللہیل کافی کو مبینہ طور پر ایک پولنگ اسٹیشن سے اس وقت باہر دھکیل دیا گیا جب وہ شکایت درج کرانا چاہتے تھے۔ اس کے بعد انہوں نے تھانے کے باہر احتجاج کیا۔
کانگریس کے سینئر رہنما ادھیر رنجن چودھری نے کہا کہ ریجیناگر میں پولیس کی نگرانی میں ”خاموش دہشت اور ووٹوں میں دھاندلی“ کا ماحول پیدا کیا گیا۔سی پی ایم امیدوار سعید نے ووٹنگ کو ”ڈراو¿نا خواب“ قرار دیا۔انہوں نے کہا، ”میں دہشت گردوں کے لوگوں کو ووٹ ڈالنے سے روکنے اور فوج و مرکزی نیم فوجی دستوں کے لوگوں میں اعتماد پیدا کرکے انہیں پولنگ اسٹیشن تک پہنچانے کی کہانیاں سنا کرتا تھا۔ لیکن منگل کو ریجیناگر میں اس کے برعکس منظر دیکھا، جہاں پولیس لوگوں میں خوف پیدا کر رہی تھی۔ کئی علاقوں میں پولیس نے پولنگ اسٹیشنوں کے آس پاس موجود ووٹروں کو بلا وجہ منتشر کر دیا۔ یہ انتہائی افسوسناک ہے۔“بی جے پی نے ان الزامات کو ”انتخابی کارکردگی سے پیدا ہونے والی مایوسی“ کا اظہار قرار دیتے ہوئے مسترد کر دیا۔
بنگال بی جے پی کے صدر سامک بھٹاچاریہ نے کہا، ”چند روز پہلے تک کچھ لوگوں کے لیے یہ یقین کرنا بھی مشکل تھا کہ ریجیناگر میں بی جے پی جیت سکتی ہے۔ صورتحال بدل گئی ہے۔ لوگوں نے ایسے الزامات لگانے والوں کو مسترد کر دیا ہے۔“مرشدآباد ضلع کے پولیس سربراہ سچن مکّر نے بھی الزامات کو مسترد کر دیا۔انہوں نے کہا، ”میں ان بیانات کا جواب نہیں دوں گا۔ میں صرف اتنا کہہ سکتا ہوں کہ ریجیناگر میں ضمنی انتخاب پ±رامن طریقے سے ہوا اور کوئی ناخوشگوار واقعہ پیش نہیں آیا۔ پولیس کے پاس اب تک ووٹ لوٹنے کی کوئی شکایت درج نہیں کرائی گئی ہے۔“نندی گرام میں کانگریس اور بائیں بازو کے حامیوں نے بی جے پی کارکنوں اور پولیس پر ووٹروں کو پولنگ اسٹیشن تک پہنچنے سے روکنے کا الزام عائد کیا۔
ہری پور کے انوپ کمار پال نے کہا، ”میرے گھر میں تین ووٹر ہیں—میں، میری بیوی اور میرا بیٹا۔ رات کے وقت میں گھر پر نہیں تھا۔ انہوں نے میرے بیٹے اور بیوی کو دھمکایا اور کہا کہ اگر ہم نے ووٹ دیا تو ہمیں گاو¿ں سے نکال دیا جائے گا۔ خوف کی وجہ سے میرا خاندان اور علاقے کے کئی خاندان پولنگ اسٹیشن تک نہیں جا سکے۔“کانگریس امیدوار ملن پردھان نے کہا کہ کئی ووٹروں کو ان کے گھروں میں محصور رکھا گیا، جبکہ جو لوگ کسی طرح پولنگ اسٹیشن تک پہنچے، ان کی انگلیوں پر سیاہی لگانے کے بعد انہیں واپس بھیج دیا گیا۔پردھان نے کہا، ”منگل کی ووٹنگ محض دکھاوے سے بھی آگے تھی۔ یہ فسطائی انداز میں اقتدار پر قبضہ کرنے کا شرمناک مظاہرہ ہے۔“کانگریس نے الزام عائد کیا کہ موٹر سائیکل سواروں کے گروہ کھجوری سرحد کے راستے نندی گرام میں داخل ہوئے ہیں اور مطالبہ کیا کہ تالپتی کینال پر واقع ٹیکہلی پل کو بند کیا جائے۔شام 5 بجے تک ریجیناگر میں تقریباً 78 فیصد ووٹنگ ریکارڈ کی گئی، جو اپریل کے انتخابات میں وہاں درج 92 فیصد ووٹنگ کے مقابلے میں نمایاں طور پر کم ہے۔اپوزیشن جماعتوں نے کہا کہ ووٹنگ کے تناسب میں اس کمی کی جانچ کی جانی چاہیے۔