کون کون سے جج بی جے پی کے ساتھ ہیں، فہرست دیجیے!‘ عدلیہ کی غیر جانبداری پر سوال اٹھانے کے بعد ابھیشیک سے سوال
اپنی سکیورٹی میں کمی کیے جانے کے خلاف ترنمول کانگریس کے رکن پارلیمنٹ ابھیشیک بنرجی نے کلکتہ ہائی کورٹ سے رجوع کیا ہے۔ اس معاملے پر چند روز قبل ایک میڈیا انٹرویو میں انہوں نے عدلیہ کی غیر جانبداری پر سوال اٹھائے تھے۔ ابھیشیک کی عرضی پر سماعت کے دوران ریاستی حکومت کے وکیل نے اسی انٹرویو کا حوالہ دیا اور دعویٰ کیا کہ عدلیہ کے بارے میں اس طرح کے تبصرے کرکے ابھیشیک نے توہینِ عدالت کی ہے۔
اس کے بعد جسٹس کرشنا راو¿ نے ابھیشیک کو سخت سرزنش کی۔ انہوں نے کہا، ”ابھیشیک فہرست دیں کہ کون کون سے جج بی جے پی کے ساتھ ہیں۔“ رکن پارلیمنٹ کی عرضی پر سماعت کے بعد جج نے اپنا فیصلہ محفوظ رکھ لیا ہے۔ابھیشیک بنرجی کو زیڈ پلس زمرے کی سکیورٹی حاصل تھی، لیکن ریاست میں اقتدار کی تبدیلی کے بعد ان کی سکیورٹی کم کرکے ایکس زمرے کی کر دی گئی۔ اسی فیصلے کے خلاف انہوں نے عدالت سے رجوع کیا۔
ان کے وکیل نے عدالت میں دلیل دیتے ہوئے کہا، ”یہ انتہائی سنگین معاملہ ہے۔ سیاسی انتقام کی وجہ سے ایک رکن پارلیمنٹ کی سکیورٹی واپس لے لی گئی ہے۔ یہ کارروائی سیاسی رہنماو¿ں کی ہدایت پر کی گئی ہے۔“اس کے بعد ریاستی حکومت کے ایڈیشنل ایڈووکیٹ جنرل بلبدل بھٹاچاریہ نے ابھیشیک کا وہ انٹرویو عدالت میں پیش کیا، جس میں انہوں نے اپنی سکیورٹی کم کیے جانے کے معاملے پر بات کرتے ہوئے عدلیہ کے ایک طبقے کی غیر جانبداری پر بھی سوال اٹھائے تھے۔
بلبدل نے دلیل دی کہ اس طرح کا انٹرویو توہینِ عدالت کے زمرے میں آتا ہے۔ تاہم ابھیشیک کے وکیل نے دعویٰ کیا کہ ان کے موکل کے مقدمے کا اس انٹرویو سے کوئی تعلق نہیں ہے۔لیکن ریاستی حکومت کے وکیل نے اس دلیل کی مخالفت کی۔ بلبدل نے کہا، ”اس انٹرویو میں عرضی گزار نے آپ کے بارے میں، معزز جج صاحبان کے بارے میں طنزیہ تبصرے کیے ہیں۔ یہاں تک کہ ایک جج کا نام بھی لیا ہے۔ عدالت کو اس طرح بے وقوف نہیں بنایا جا سکتا۔“
انہوں نے مزید کہا کہ سیاسی حریفیاں اپنی جگہ ہو سکتی ہیں، لیکن عدالت ان تمام چیزوں سے بالاتر ہے۔ ریاستی حکومت کے وکیل نے انٹرویو کی نقل سے ابھیشیک کے بیانات بھی پڑھ کر سنائے اور ان کے خلاف ازخود توہینِ عدالت کی کارروائی شروع کرنے کی درخواست کی۔دوسری جانب ابھیشیک کے وکیل نے بار بار عدالت سے اپیل کی کہ اصل عرضی سے توجہ ہٹانے کی کوشش نہ کی جائے۔ انہوں نے یہ بھی دعویٰ کیا کہ جان بوجھ کر ان کے موکل کو نشانہ بنایا جا رہا ہے۔
وکیل کے مطابق، رات دو بجے ابھیشیک کے گھر میں توڑ پھوڑ کی گئی۔ ان کا واحد قصور یہ ہے کہ وہ انتخاب ہار گئے ہیں اور اسی وجہ سے ان کی سکیورٹی کم کر دی گئی ہے۔ ان پر اب تک چھ مرتبہ حملے ہو چکے ہیں۔ وکیل نے ریاست میں قانون کی حکمرانی کی صورتحال کو بھی انتہائی خراب قرار دیا۔اس کے بعد جسٹس کرشنا راو¿ نے کہا، ”اپنے موکل سے پوچھیں کہ کون کون سے جج بی جے پی کے ساتھ ہیں اور کون نہیں! وہ تو خود کو بہت ذہین سمجھتے ہیں۔ ان سے کہیں کہ ایک فہرست بنا کر دیں۔ میں اسے دیکھ لوں گا۔“
انہوں نے مزید کہا، ”عدالت تو موجود ہے۔ اگر اس عدالت سے انہیں کوئی راحت نہیں ملی تو وہ کسی دوسری بینچ سے رجوع کر سکتے تھے۔ تعطیلات کے دوران بھی کئی بینچیں کام کر رہی تھیں۔“جج نے یہ بھی کہا، ”آپ کے موکل ایک تعلیم یافتہ شخص ہیں۔ وہ ایک رکن پارلیمنٹ ہیں۔ وہ کوئی عام شہری نہیں ہیں کہ ان کے ساتھ ایک عام شہری جیسا معاملہ کیا جائے۔“انہوں نے مزید سرزنش کرتے ہوئے کہا، ”آپ کے موکل تو ججوں کی سالانہ خفیہ کارکردگی رپورٹ (ACR) بھی خود ہی لکھ رہے ہیں!“
واضح رہے کہ میڈیا کو دیے گئے انٹرویو میں ابھیشیک بنرجی نے کہا تھا، ”پولیس کوئی کارروائی نہیں کر رہی ہے۔ میں نے عدالت میں مقدمہ دائر کیا ہے۔ ایسا لگتا ہے کہ وہاں دباو¿ ہے۔ میری سکیورٹی کم کیے جانے کے معاملے کی سماعت نہ ہو، اس کی کوشش کی جا رہی ہے۔ بی جے پی کی غنڈہ گردی جاری ہے، کیونکہ عدلیہ میں مقدمات زیر التوا ہیں۔ اڈانی کا مقدمہ ایک دن میں نمٹا دیا جاتا ہے، لیکن میرے مقدمے میں تین ماہ سے کچھ نہیں ہو رہا۔ بہت سے جج آئین کے تحفظ کی کوشش کر رہے ہیں۔ یہ کہنے میں کوئی جھجک نہیں کہ ایک طبقہ بی جے پی کے ہاتھوں بک چکا ہے! یہ کس طرح کی عدلیہ ہے؟“ابھیشیک کے مقدمے میں اس انٹرویو کا حوالہ دیے جانے کے بعد ہی عدالت نے یہ سخت تبصرہ کیا۔ فی الحال سکیورٹی میں کمی سے متعلق مقدمے کا فیصلہ محفوظ ہے۔
کون کون سے جج بی جے پی کے ساتھ ہیں، فہرست دیجیے!‘ عدلیہ کی غیر جانبداری پر سوال اٹھانے کے بعد ابھیشیک سے سوال...
Source: Admin
