تلنگانہ میں ہوئی 64 فیصد ووٹنگ

حیدرآباد، 30 نومبر: تلنگانہ اسمبلی انتخابات میں ووٹنگ جمعرات کو کچھ اکا دکا واقعات کو چھوڑ کر پرامن رہی اور ریاست میں تقریباً 64 فیصد رائے دہندگان نے اپنے حق رائے دہی کا استعمال کیا۔ ایک انتخابی افسر نے بتایا کہ شام 5 بجے کے مقررہ اختتامی وقت تک کل 3.26 کروڑ رائے دہندگان میں سے 63.94 فیصد اپنے حق رائے دہی کا استعمال کرنے پولنگ بوتھ پر پہنچے۔ تاہم، ریاست کے کل 119 حلقوں میں سے 13 نکسل متاثرہ سیٹوں پر پولنگ ایک گھنٹہ پہلے (شام 4 بجے) ختم ہوگئی۔ الیکشن افسر نے حتمی ووٹنگ کے اعداد و شمار میں اضافے کا امکان ظاہر کیا ہے۔ واضح رہے کہ 2018 میں ریاستی اسمبلی انتخابات میں 73 فیصد ووٹنگ ہوئی تھی۔ گزشتہ اسمبلی انتخابات کے مقابلے اس بار ووٹنگ فیصد کم رہا ہے۔ حتمی ووٹنگ فیصد آنے کے بعد صورتحال واضح ہو سکے گی۔ تلنگانہ کے چیف الیکٹورل آفیسر (سی ای او) وکاس راج نے کہا ’’مختلف مقامات پر ایک یا دو معمولی جھڑپوں کو چھوڑ کر، ووٹنگ مجموعی طور پر پرامن رہی۔ سی ای او راج نے کہا کہ تکنیکی خرابی کی وجہ سے دو مقامات پر ای وی ایم تبدیلی کی گئی۔ انہوں نے کہا کہ ان کے دفتر کو بھارت راشٹرا سمیتی (بی آر ایس) ایم ایل سی کے کویتا اور دیگر سیاسی رہنماؤں کے خلاف شکایات موصول ہوئی تھیں، جنہیں متعلقہ ضلعی انتخابی حکام کو ان کی رپورٹس کے لیے بھیجا گیا تھا۔

Source: uni news service