دھرم شالہ، 08 مئی:ہندستانی کرکٹ کنٹرول بورڈ نے پنجاب کنگز اور دہلی کیپٹلزکے درمیان جمعرات کو کھیلے جا رہے انڈین پریمیئر لیگ (آئی پی ایل) کے 58ویں میچ کو ایچ پی سی اے اسٹیڈیم میں تکنیکی خرابی کے بعد منسوخ کر دیا ہے۔ اس سے قبل آج یہاں بارش کی وجہ سے میچ کے ٹاس میں تاخیر ہوئی۔ تاخیر کے بعد پنجاب کنگز کے کپتان شریس ایئر نے ٹاس جیت کر بلے بازی کا فیصلہ کیا۔ پنجاب کے پریانش آریہ اور پربھ سمرن سنگھ کی جوڑی نے جارحانہ آغاز کرتے ہوئے پہلی وکٹ کے لیے 122 رنز جوڑے۔ 11ویں اوور کی پہلی گیند پر تھنگارسو نٹراجن نے پریانش آریہ کو آؤٹ کر کے دہلی کو پہلی کامیابی دلائی۔ پریانش آریہ نے 34 گیندوں پر چھ چھکوں اور پانچ چوکوں کی مدد سے 70 رنز کی اننگز کھیلی۔ تکنیکی خرابی کی وجہ سے میچ روکے جانے کے وقت پربھ سمرن سنگھ 28 گیندوں پر 50 رنز بنا کر کریز پر موجود تھے۔ اس کے بعد بی سی سی آئی نے بیان جاری کرتے ہوئے کہا، "ٹاٹا آئی پی ایل 2025 کا مقابلہ نمبر 58 پنجاب کنگز بمقابلہ دہلی کیپیٹلز دھرم شالہ کے ایچ پی سی اے اسٹیڈیم میں ایک تکنیکی خرابی کی وجہ سے منسوخ کرنا پڑا۔ علاقے میں بجلی کی بندش کی وجہ سے اسٹیڈیم کے ایک فلڈ لائٹ ٹاور نے کام کرنا بند کر دیا۔ بی سی سی آئی نے اس پریشانی کے لیے اسٹیڈیم میں موجود ناظرین سے معذرت کی ہے۔"

Source: uni nwes