نئی دہلی : سپریم کورٹ نے بدھ کے روز اُس درخواست پر فوری سماعت سے انکار کر دیا، جس میں NEET پیپر لیک تنازع کے خلاف دہلی میں کاکروچ جنتا پارٹی (CJP) کے زیرِ اہتمام ہونے والے مارچ کے دوران طالب علم مظاہرین پر پولیس کی مبینہ کارروائی کی عدالتی نگرانی میں تحقیقات کا مطالبہ کیا گیا تھا۔ یہ معاملہ چیف جسٹس آف انڈیا جسٹس سوریہ کانت کے سامنے ایڈووکیٹ نریندر مشرا نے اٹھایا، جنہوں نے درخواست کو فوری طور پر سماعت کے لیے مقرر کرنے کی استدعا کی۔ درخواست میں الزام عائد کیا گیا تھا کہ مظاہرے کے دوران پولیس نے مظاہرین کے ساتھ بدسلوکی اور زیادتی کی۔ یہ احتجاج مرکزی وزیرِ تعلیم دھرمیندر پردھان کے استعفے اور امتحان کے نظام میں اصلاحات کے مطالبے کے لیے کیا جا رہا تھا۔ فوری سماعت کی درخواست مسترد کرتے ہوئے چیف جسٹس نے ریمارکس دیتے ہوئے کہا کہ “ہمارا وقت ضائع نہ کریں، اور اپنا وقت بھی ضائع نہ کریں۔” درخواست گزار کے وکیل نے مؤقف اختیار کیا کہ طلبہ اہم قومی مسائل اٹھا رہے ہیں، جن میں NEET امتحان کے شفاف انعقاد اور نیشنل ٹیسٹنگ ایجنسی (NTA) میں اصلاحات شامل ہیں۔ تاہم، بینچ نے اس معاملے کو فوری سماعت کے لیے مقرر کرنے سے انکار کر دیا۔ جب وکیل نے اُن ویڈیوز کا حوالہ دیا جن میں مبینہ طور پر مظاہرین کے خلاف پولیس کارروائی دکھائی گئی تھی، تو چیف جسٹس نے کہا کہ “ہمیں ویڈیوز میں کوئی دلچسپی نہیں، ہمارے پاس انہیں دیکھنے کا وقت نہیں ہے۔” درخواست میں دہلی میں CJP کی قیادت میں نکالے گئے ‘سنسد چلو’ مارچ کے دوران طلبہ پر مبینہ لاٹھی چارج کی عدالتی نگرانی میں تحقیقات کا مطالبہ کیا گیا تھا۔ مظاہرین کا کہنا تھا کہ وہ امتحان کے سوالات کے مبینہ لیک ہونے کے معاملے میں جوابدہی کا مطالبہ کرنے کے لیے جمع ہوئے تھے۔ سپریم کورٹ کا یہ فیصلہ ایسے وقت میں سامنے آیا جب اس سے صرف ایک روز قبل دہلی ہائی کورٹ بھی اسی نوعیت کی درخواست پر فوری سماعت سے انکار کر چکی تھی۔ فوری سماعت سے انکار کرتے ہوئے دہلی ہائی کورٹ نے ریمارکس دیے تھے کہ “عدالت کو اس معاملے میں نہ گھسیٹیں۔”

Source: Admin