برہمنوں نے جب سے بی جے پی کا جھنڈا اٹھایا تب سے مسلمان ان سے دور ہوگئے: پرشانت کشور
جن سوراج پارٹی کے بانی اور رکن اسمبلی پرشانت کشور نے بہار کے میتھلا علاقے میں برہمن برادری کی گرتی ہوئی سیاسی اور معاشی حیثیت، روایتی سیاسی وفاداریوں اور ماضی کی عظمت پر فخر کرنے کے رجحان پر سوالات اٹھائے۔ روزگار، برہمنوں کی سیاسی نمائندگی اور ماضی میں مسلمانوں کی جانب سے ملنے والی حمایت کے حوالے سے ان کے بے باک بیانات کو سراہا بھی جا رہا ہے اور ان پر تنقید بھی ہو رہی ہے۔
جن سوراج پارٹی کے بانی پرشانت کشور نے بہار کے میتھلا علاقے میں ایک اجتماع سے خطاب کرتے ہوئے وہاں کے معروف برہمن طبقے کو ان کی گرتی ہوئی معاشی حالت، سیاست میں کردار اور ماضی کی عظمت کے سہارے زندگی گزارنے کے رجحان کے بارے میں کئی تلخ باتیں کہیں۔ عام طور پر سیاست دان برادریوں کی خوشامد کرتے ہیں، لیکن کشور نے سوال اٹھایا کہ بہار کے برہمن، جو ریاست کی آبادی کا تقریباً 3 سے 4 فیصد ہیں، برسوں سے برہمن ایم ایل اے اور ایم پی منتخب کرنے کے باوجود معاشی پریشانیوں کا شکار کیوں ہیں؟
بھگوان پرشورام کا حوالہ دیتے ہوئے، جنہیں برہمن برادری کلہاڑی بردار جنگجو رشی کے طور پر مانتی ہے، پرشانت کشور نے کہا کہ برہمنوں کی اصل طاقت کلہاڑی چلانے میں نہیں بلکہ قلم تھامنے، کتابیں پڑھنے، اپنی صدیوں پرانی علمی روایت کو محفوظ رکھنے اور علم و حکمت کی دیوی سرسوتی کی عبادت میں ہے۔
پرشانت کشور، جنہیں پی کے بھی کہا جاتا ہے، نے یہ دعویٰ بھی کیا کہ بہار میں برہمن رہنماو¿ں کو کبھی مسلمانوں کی حمایت حاصل ہوا کرتی تھی، لیکن بی جے پی کے ساتھ اتحاد کرنے اور مسلمانوں کو ناراض کرنے کے بعد انہوں نے یہ حمایت کھو دی۔
یہ بیانات دربھنگہ ضلع میں منعقدہ ایک اجتماع کے دوران دیے گئے۔ جن سوراج نے 5 نومبر کو ایکس پر اس خطاب کی اطلاع دی، جبکہ 6 نومبر کو اپنے سرکاری یوٹیوب ہینڈل پر اس کی ویڈیوز شیئر کیں۔ بعد ازاں کئی سوشل میڈیا انفلوئنسرز نے بھی ویڈیوز شیئر کیں، جن میں سے بعض کلپس اب وائرل ہو چکے ہیں۔
پی کے کے بیانات پر زیادہ تر لوگوں نے مثبت ردعمل ظاہر کیا اور ان کی بے باکی کی تعریف کی، جبکہ کچھ لوگوں نے ان پر تنقید بھی کی۔ لیکن آخر پرشانت کشور نے کیا کہا اور برہمن برادری پر ان کی تنقید کس حد تک درست ہے؟ایکس پر ویڈیو پر ردعمل ظاہر کرتے ہوئے نئی دہلی کے سیاسی تجزیہ کار مدن موہن جھا نے کہا، ”دربھنگہ میں برہمنوں کے ایک اجتماع سے پرشانت کشور نے جو کچھ کہا ہے، اس سے بحث چھڑ گئی ہے، لیکن میری نظر میں ان کی باتیں حقیقت سے زیادہ قریب ہیں۔“
ایکس پر ایک اور اکاو¿نٹ بہاری مین نے کہا، ”پرشانت کشور انتخابات میں تعلیم اور روزگار کے لیے لڑنے، بہاری شناخت اور اتحاد کی بات کرتے ہوئے میدان میں اترے تھے، لیکن اب وہ بھی برہمنوں اور مسلمانوں کو شامل کرکے ذات پر مبنی سیاست کرنے لگے ہیں۔جن سوراج کے بانی کے یہ بیانات دربھنگہ میں منعقدہ پروگرام کے دوران اس وقت سامنے آئے، جب ایک شریک نے مطالبہ کیا کہ ان کی پارٹی کی جانب سے کسی برہمن کو امیدوار بنایا جائے۔
اس پر پی کے نے برادری کے انتخابی فیصلوں پر سوال اٹھاتے ہوئے کہا کہ میتھلا، جو کبھی علماء اور دانشوروں کی سرزمین ہوا کرتی تھی، آج مزدوروں کی سرزمین بن کر رہ گئی ہے۔ ان کا کہنا تھا کہ برہمنوں نے تعلیم اور سماجی ذمہ داری کو ترک کر دیا ہے، جو کبھی ان کی پہچان ہوا کرتی تھی۔ان کی تقریر بظاہر ذات پر مبنی فخر اور برادری کی شناخت پر ایک نصیحت تھی۔ سوشل میڈیا پر کئی لوگوں نے کہا کہ ایسی بات کہنے کی ہمت کسی دوسرے رہنما میں نہیں ہے۔
انہوں نے اس تصور کو چیلنج کیا کہ اپنی برادری کے رہنماو¿ں کو منتخب کرنے سے خود بخود خوشحالی آ جاتی ہے۔ ساتھ ہی انہوں نے سماجی اور مذہبی تقسیم کی سیاست کی قیمت پر بھی سوال اٹھایا۔ بہار میں جہاں ذات پات کے اتحاد انتخابی سیاست اور سیاسی پیغام رسانی میں اہم کردار ادا کرتے ہیں، وہیں پی کے کے یہ بیانات بی جے پی اور ریاست میں رائج روایتی ووٹ بینک کی سیاست پر بھی براہ راست تنقید تھے۔خود برہمن ہونے کے باوجود پرشانت کشور میتھل برہمن نہیں ہیں۔ ان کا تعلق بہار کے جنوب مغربی ضلع روہتاس کے کونار گاو¿ں سے ہے اور ان کی پرورش بھوجپور خطے کے بکسر میں ہوئی۔
پرشانت کشور کے یہ بیانات جن سوراج پارٹی کی دو اہم انتخابی کامیابیوں کے بعد سامنے آئے ہیں۔ اگست میں انہوں نے بانکی پور اسمبلی ضمنی انتخاب میں بی جے پی امیدوار کو شکست دی تھی۔ یہ نشست طویل عرصے سے بی جے پی کا مضبوط گڑھ سمجھی جاتی رہی ہے۔ چند ہفتے قبل جن سوراج پارٹی کو اپنا پہلا ایم ایل سی انتخابی کامیاب امیدوار بھی دربھنگہ سے ملا تھا۔ اب پی کے کی قیادت والی پارٹی بہار میں اپنا سیاسی دائرہ بڑھانے اور اپوزیشن کی جگہ حاصل کرنے کی کوشش کر رہی ہے۔
انہوں نے کہا، ”آپ کے ایم ایل اے پہلے ہی برہمن ہیں۔ اور صرف ایک دو سال سے نہیں بلکہ گزشتہ 15 برسوں سے۔ آپ کے ایم پی بھی برہمن ہیں۔ اس کے باوجود آپ اتنی پریشانی میں کیوں زندگی گزار رہے ہیں؟ اگر صرف برہمن کو منتخب کرنے سے آپ کے مسائل حل ہو سکتے تھے تو آپ کو اس حال میں نہیں ہونا چاہیے تھا۔“ان کے اس بیان نے اس مفروضے کو چیلنج کیا کہ ذات کی بنیاد پر سیاسی نمائندگی سے لازمی طور پر برادری کی ترقی ہوتی ہے۔پی کے نے دعویٰ کیا کہ گاو¿ں کے نصف سے زیادہ خاندانوں کے بچے 10 ہزار سے 20 ہزار روپے ماہانہ تنخواہ والی ملازمت حاصل کرنے کے لیے جدوجہد کر رہے ہیں۔انہوں نے کہا کہ 20 سے 30 بیگھہ زمین کے مالک افراد بھی اپنے بچوں کے روزگار کے لیے ان سے سفارش کرنے کی درخواست کرتے ہیں۔انہوں نے ایسے لوگوں کی بات دہراتے ہوئے کہا، ”بھائی صاحب، ہمارے خاندان میں ایک بچہ ہے۔ کیا آپ اسے 20 ہزار روپے کی نوکری دلانے میں مدد کر سکتے ہیں؟ ورنہ ہمارے لیے گھر کا خرچ چلانا بھی مشکل ہو رہا ہے۔“میتھلا کے برہمنوں کی ایک الگ شناخت ہے، جس کی بنیاد صدیوں پرانی سنسکرت کی علمی روایت، میتھلی ادب، پنچی نسب ناموں کی روایت اور دربھنگہ راج کی تاریخی وراثت پر قائم ہے۔
کشور کا دعویٰ تھا کہ برہمن رہنماو¿ں کو تاریخی طور پر مسلمانوں کے ووٹوں کی حمایت حاصل رہی ہے، لیکن بی جے پی کے ساتھ سیاسی وابستگی اختیار کرنے اور سوشل میڈیا پر مسلمانوں کے خلاف بیان بازی کرنے کے بعد یہ حمایت ختم ہو گئی۔
انہوں نے کہا، ”آپ نے بی جے پی کا جھنڈا اٹھانا شروع کر دیا اور مسلمان ووٹ آپ سے دور ہو گئے۔ مسلمانوں سے آپ کا کیا اختلاف ہے؟ زمین کا معاملہ ہے یا ریزرویشن کا؟ آپ فیس بک پر انہیں گالیاں دیتے ہیں اور پھر حیران ہوتے ہیں کہ جو لوگ کبھی آپ کو ووٹ دیتے تھے، انہوں نے آپ کا ساتھ کیوں چھوڑ دیا؟“
برہمنوں نے جب سے بی جے پی کا جھنڈا اٹھایا تب سے مسلمان ان سے دور ہوگئے: پرشانت کشور...
Source: Admin
