کالی پوجا کے موقع پر بھی بائیں بازو کے بک اسٹال میں توڑ پھوڑ، نوجوان کامریڈوں نے کیا مزاحمت
درگا پوجا کے بعد اب کالی پوجا کے موقع پر بھی کولکاتا اور مختلف اضلاع میں بائیں بازو کی تنظیموں کی جانب سے بک اسٹال لگائے گئے ہیں۔ لیکن درگا پوجا کی طرح دیوالی کے موقع پر بھی ان بک اسٹالوں پر حملوں کا سلسلہ جاری ہے۔ کالی پوجا کی رات ریاست کے کئی مقامات سے حملوں کی خبریں سامنے آئی ہیں۔ بائیں بازو کے نظریات سے وابستہ افراد نے سوشل میڈیا پر ان واقعات کی ویڈیوز پوسٹ کی ہیں۔ کہیں اسٹال سے کتابیں اٹھا کر زمین پر پھینک دی گئیں۔ تاہم نوجوان کامریڈوں نے ان حملوں کے خلاف مزاحمت کرتے ہوئے دوبارہ اسٹال پر کتابیں سجائیں۔ دوسری جانب کچھ اضلاع میں بائیں بازو کے بک اسٹالوں کو لوگوں کی جانب سے اچھا ردعمل بھی مل رہا ہے۔
کسی بھی تہوار کے موقع پر عوام سے رابطہ بڑھانے کے ساتھ ساتھ بائیں بازو اور ترقی پسند ادب کو فروغ دینے کے مقصد سے ریاست بھر میں بک اسٹال لگانے کا منصوبہ بنایا گیا ہے۔ اسی منصوبے کے تحت کالی پوجا اور دیوالی کے موقع پر بھی کامریڈوں نے کتابوں کے ذخیرے کے ساتھ اسٹال لگائے۔ لیکن اس بار بھی درگا پوجا کے دوران پیش آنے والے واقعات کی تکرار دیکھنے کو ملی۔ مختلف مقامات پر بائیں بازو کے ان بک اسٹالوں میں توڑ پھوڑ کی گئی۔ ان واقعات کے لیے بی جے پی کارکنوں پر الزامات عائد کیے جا رہے ہیں۔
ہابڑا کے کھارو بازار اور نیہاٹی میں ایس ایف آئی کے اسٹالوں پر حملے کیے گئے۔ تاہم ان حملوں کے باوجود اسٹال جاری ہیں۔ زمین پر پھینکی گئی شرت چندر چٹوپادھیائے، سوکانتو بھٹاچاریہ اور میکسم گورکی جیسے معروف ادیبوں کی کتابیں دوبارہ اٹھا کر اسٹالوں پر سجائی جا رہی ہیں۔ ہر روز پارٹی کے کسی نہ کسی سینئر رہنما کو بھی وہاں دیکھا جا رہا ہے۔ کتابوں کی فروخت کے ساتھ ساتھ عوام کی باتیں سنی جا رہی ہیں اور ان کے ساتھ خیالات کا تبادلہ بھی ہو رہا ہے۔
اس سے قبل درگا پوجا کے دوران بائیں بازو کے بک اسٹالوں پر حملوں کے بعد کولکاتا میں ادب اور ثقافت سے دلچسپی رکھنے والے افراد نے ہاتھوں میں کتابیں لے کر احتجاجی مارچ نکالا تھا۔ انہوں نے عہد کیا تھا کہ علم کی علامت کتابوں پر ایسے حملے برداشت نہیں کیے جائیں گے۔
ان واقعات کے بعد علیم الدین اسٹریٹ کے پارٹی رہنماو¿ں نے فیصلہ کیا کہ اب صرف بک اسٹال لگانے تک محدود نہیں رہا جائے گا، بلکہ کندھوں پر کتابوں کے تھیلے لٹکا کر گھر گھر پہنچا جائے گا اور سامراجیت مخالف کتابیں عوام تک پہنچائی جائیں گی۔
کالی پوجا کے موقع پر بھی کتابوں کے اسٹالوں پر حملوں کے واقعات سے بائیں بازو کی تنظیموں کے حوصلے پست نہیں ہوئے ہیں، بلکہ ان کا کہنا ہے کہ اس سے بک اسٹالوں کی سرگرمیاں مزید وسیع ہوں گی۔
کامریڈوں نے اپیل کی ہے کہ بنگال کی تعلیم اور ثقافت کے تحفظ کے لیے شمالی 24 پرگنہ ضلع بھر میں طلبہ کے تمام بک اسٹالوں تک پہنچیں اور ان کی حفاظت کریں۔ کتابیں پڑھیں، خریدیں اور دوسروں کو تحفے میں دیں۔
کالی پوجا کے موقع پر بھی بائیں بازو کے بک اسٹال میں توڑ پھوڑ، نوجوان کامریڈوں نے کیا مزاحمت...
Source: Admin
