شمالی چنئی میں بھیل اینور یونٹ حادثہ میں نو مزدور ہلاک، وزیراعلیٰ نے معاوضے کا اعلان کیا

چنئی، 30 ستمبر : تمل ناڈومیں چنئی کے شمالی مضافاتی علاقے اینور میں ایک المناک واقعہ میں آج رات بھیل پاور پلانٹ کے تعمیراتی مقام پر اسٹیل کی آرچ گرنے سے نو تارکین وطن مزدوروں کی موت ہو گئی۔ پولیس ہیڈ کوارٹر سے موصول ہونے والی اطلاعات کے مطابق نو کارکن موقع پر ہی جاں بحق ہوگئے، زخمیوں کی مزید تفصیلات کا انتظار ہے۔ تمل ناڈو کے وزیر اعلی ایم کے سٹالن نے بھی ایک بیان میں اس کی تصدیق کی اور ان کے خاندانوں کو دس دس لاکھ روپے کے معاوضے کا اعلان کیا۔ فوری طور پر سانحے میں زخمیوں کی تعداد معلوم نہیں ہو سکی۔ مرنے والے آسام کے تارکین وطن مزدور تھے۔ سینئر آئی اے ایس افسر اور ٹی اے این جی ای ڈی سی او کے چیئرمین ڈاکٹر جے رادھا کرشنن نے موقع پر پہنچ کر بتایا کہ ہلاک ہونے والے مزدوروں کا تعلق آسام سے تھا۔ بھیل کے سینئر افسران تعمیراتی مقام پر پہنچ گئے ہیں۔ پولیس، فائر سروس اور ریسکیو اہلکار، محکمہ بجلی کے اہلکاروں کے ساتھ راحت اور بچاؤ کے کاموں میں مصروف ہیں۔ مرنے والوں کی لاشوں کو پوسٹ مارٹم کے لیے سرکاری اسپتال بھیج دیا گیا ہے۔ جائے وقوعہ کا دورہ کرنے کے بعد نامہ نگاروں سے بات کرتے ہوئے ڈاکٹر رادھا کرشنن نے کہا کہ اینور تھرمل پاور پلانٹ کی تعمیراتی سائٹ پر ایک افسوسناک واقعہ اس وقت پیش آیا جب اسٹیل کا ایک محراب گر گیا جس سے آسام سے تعلق رکھنے والے نو مہاجر مزدور ہلاک ہو گئے۔ ابتدائی رپورٹوں کا حوالہ دیتے ہوئے، انہوں نے کہا کہ ایک شخص شدید زخمی ہے اور اسے علاج کے لیے سٹینلے گورنمنٹ میڈیکل کالج اسپتال لے جایا گیا ہے۔ ان کا مزید کہنا تھا کہ سانحہ کی اصل وجہ جاننے کے لیے تحقیقات جاری ہیں۔ دریں اثنا، تمل ناڈو کے وزیر اعلی ایم کے اسٹالن نے مرنے والوں کے لواحقین کو ہر ایک کو دس دس لاکھ روپے کی ایکس گریشیا کا اعلان کیا۔ موقع پر کام کررہے آسام کے نو کارکنوں کی موت پر گہرے رنج و غم کا اظہار کرتے ہوئے، مسٹر اسٹالن نے ایک بیان میں کہا کہ انہوں نے راحت اور بچاؤ کاموں کی نگرانی کے لیے بجلی کے وزیر ایس ایس شیو شنکر کو جائے وقوع پر تعینات کیا ہے۔ مرنے والے مزدوروں کے خاندانوں کو 10-10 لاکھ روپے کے معاوضے کا اعلان کرتے ہوئے، مسٹر اسٹالن نے کہا کہ لاشوں کو ان کی آبائی ریاستوں تک پہنچانے کے لیے اقدامات کیے جا رہے ہیں۔

Source: uni urdu news service