شاہ رخ خان کو نیشنل ایوارڈ ملنے پر منوج باجپائی نے خاموشی توڑ دی

فلم انڈسٹری کے سپر اسٹار شاہ رخ خان کو بلاک بسٹر فلم ’جوان‘ پر پہلا نیشنل ایوارڈ ملنے کے بعد جاری بحث پر اب منوج باجپائی نے خاموشی توڑ دی ہے۔ فلم بینوں کی ایک بڑی تعداد کا ماننا تھا کہ یہ اعزاز اداکار منوج باجپائی کو ان کی فلم ’صرف ایک بندہ کافی ہے‘ میں شاندار اداکاری پر ملنا چاہیے تھا۔ انڈیا ٹوڈے سے گفتگو میں منوج باجپائی نے شاہ رخ خان سے اپنی اداکاری کے موازنے کو مسترد کرتے ہوئے کہا کہ یہ سب ’ہارنے والوں کی باتیں‘ ہیں۔ انہوں نے تسلیم کیا کہ’صرف ایک بندہ کافی ہے‘ میرے کیریئر کی ایک خاص فلم ہے، مگر میرے نزدیک ایوارڈ کا فیصلہ ماضی کا حصہ ہے اور اسے وہیں چھوڑ دینا چاہیے۔ انہوں نے کہا کہ یہ بیکار گفتگو ہے کیونکہ یہ گزر چکا ہے، یہ میری فلموگرافی میں ایک خاص فلم رہے گی، لیکن ایسی باتوں پر بات کرنا میرے نزدیک ہارنے والوں جیسا رویہ ہے، یہ سب ماضی ہے، اسے وہیں رہنے دیں۔ منوج باجپائی کا کہنا تھا کہ ایوارڈز اب اپنی ساکھ کھو رہے ہیں کیونکہ اب ان کا رجحان زیادہ تر کمرشل کامیابی کو سراہنے کی طرف ہوگیا ہے۔ انہوں نے کہا کہ یہ صرف نیشنل ایوارڈز کا مسئلہ نہیں، یہ سبھی ایوارڈز پر لاگو ہوتا ہے، ہر ادارے کو سوچنا چاہیے کہ وہ کس سمت میں جا رہے ہیں، میری عزت میرے کرداروں کے انتخاب سے جڑی ہے، نہ کہ ایوارڈ سے۔ منوج باجپائی نے مزید کہا کہ میں بنیادی طور پر ایوارڈز کے تصور پر یقین نہیں رکھتا کیونکہ بھارتی سنیما مختلف زبانوں پر مشتمل ہے اور کسی ایوارڈ سے تمام فنکاروں کی کارکردگی کو برابر نہیں پرکھا جا سکتا۔ انہوں نے کہا کہ میرے نزدیک ایوارڈز محض گھر کی سجاوٹ کا ایک سامان ہیں، اصل کامیابی ناظرین سے جڑنے اور کہانی کو بہتر طریقے سے بیان کرنے میں ہے۔

Source: Social media