رونالڈو کا بڑا اعلان!

امریکا (6 جولائی 2026): پرتگال کے کپتان اسٹار فٹبالر کرسٹیانو رونالڈو نے پری کوارٹر فائنل میچ سے قبل بڑا اعلان کر دیا ہے۔ پرتگال کی ٹیم کل اسپین کے خلاف پری کوارٹر فائنل کھیلنے کے لیے میدان میں اترے گی۔ اس بڑے میچ سے قبل اسٹار فٹبالر اور پرتگالی کپتان کرسٹیانو رونالڈو نے بڑا اعلان کر دیا۔ میڈیا سے گفتگو کرتے ہوئے 41 سالہ رونالڈو نے کہا کہ امید ہے کہ کل میرا آخری میچ نہیں ہوگا تاہم یہ میرا آخری ورلڈ کپ ہوگا۔ پانچ مرتبہ بیلن ڈی اور ایوارڈ جیتنے والے رونالڈو نے کہا کہ ان کے شاندار کیریئر کا فیصلہ صرف اس بات سے نہیں ہوگا کہ آیا وہ ورلڈ کپ جیت پاتے ہیں یا نہیں۔ انہوں نے مزید کہا کہ اپنی قومی ٹیم کے ساتھ سفر کے آخری مرحلے سے بھرپور لطف اندوز ہونا چاہتا ہوں۔ میں نے دو دہائیوں سے زائد عرصے میں فٹبال کو اپنا 100 فیصد نہیں بلکہ ایک ہزار فیصد دیا ہے۔ رونالڈو نے کہا کہ ایک دن بین الاقوامی فٹبال میں ریٹائرمنٹ ضرور آنی ہے۔ تاہم جو بھی ہو، میں مطمئن ضمیر کے ساتھ میدان چھوڑوں گا کیونکہ میں نے اس کھیل کے لیے اپنی ہر ممکن کوشش کی ہے۔ انہوں نے اپنی عمر پر ہونے والی تنقید کا جواب دیتے ہوئے کہا کہ میں فٹبال کسی مجبوری یا ضرورت کے تحت نہیں بلکہ اپنے شوق کی وجہ سے کھیلتا ہوں اور ہر دن سے لطف اٹھاتا ہوں۔ میں اب بھی اعلیٰ سطح پر بہترین کھیل پیش کر رہا ہوں اور اس ورلڈ کپ میں 3 گول کر چکا ہوں۔ واضح رہے کہ 41 سالہ رونالڈو رواں فیفا ورلڈ کپ میں ازبکستان کے خلاف میچ میں 2 گول کر کے اب تک ورلڈ کپ کے 6 مختلف ایڈیشنز میں گول کرنے والے تاریخ کے پہلے فٹبالر بننے کا اعزاز پا چکے ہیں۔

Source: social media