ریاست میں حذف کیے گئے ووٹروں کے نام دوبارہ شامل کرنے کا کام شروع، الیکشن کمیشن نے نوٹیفکیشن جاری کر دیا
ریاست میں ایس آئی آر کے دوران حذف کیے گئے ووٹروں کے نام دوبارہ شامل کرنے کا عمل شروع ہو گیا ہے۔ قومی الیکشن کمیشن کی ہدایت کے مطابق سی ای او دفتر نے یہ عمل شروع کیا ہے۔ منگل کے روز ایڈیشنل سی ای او افسر ارندم نِیوگی کی جانب سے اس سلسلے میں رہنما ہدایات جاری کی گئی ہیں۔ غیر حاضر، منتقل شدہ، فوت شدہ اور ڈیلیٹڈ قرار دے کر جن ووٹروں کے نام فہرست سے حذف کیے گئے تھے، ان کے نام دوبارہ شامل کرنے کا عمل شروع کرنے کو کہا گیا ہے۔ اس کے ساتھ ہی پہلی مرتبہ ووٹر لسٹ میں نام شامل کرنے کے لیے درخواست فارم بھی وصول کیے جائیں گے۔ یعنی جن کی عمر 18 سال ہو چکی ہے، وہ بھی درخواست دے سکیں گے۔
ایس آئی آر کے ابتدائی مرحلے کے اعداد و شمار کے مطابق، ریاست میں مجموعی طور پر 46 لاکھ 20 ہزار نام حذف کیے جانے کے لیے نشان زد کیے گئے تھے۔ اس عمل میں بنیادی طور پر اے ایس ڈی فارمولے کی بنیاد پر نام حذف کیے گئے۔ نئے نوٹیفکیشن کے مطابق، جن اہل ووٹروں کے نام اے ایس ڈی ڈی فارمولے کے تحت حذف ہو گئے ہیں، وہ آن لائن یا بی ایل او کے پاس نیا فارم 6 جمع کرا سکتے ہیں۔ حذف کیے گئے ناموں کی فہرست سی ای او کی ویب سائٹ اور ای آر اوز کے پاس موجود ہے۔ اسے دیکھ کر درخواست دی جا سکتی ہے۔
اس کے ساتھ ہی جن کی عمر 18 سال ہو چکی ہے، وہ بھی الیکشن کمیشن کے ضوابط کے مطابق درخواست دے سکتے ہیں۔ بتایا گیا ہے کہ وہ آن لائن یا آف لائن دونوں طریقوں سے درخواست دے سکیں گے۔ تاہم درخواست جمع کرانے کی آخری تاریخ کا ذکر نہیں کیا گیا ہے۔دوسری جانب، بنگال میں 27.16 لاکھ ووٹروں کے نام ٹریبونل میں زیرِ التوا ہیں۔ عدالتی کارروائی کے دوران جن لوگوں کے نام حذف ہوئے ہیں، انہوں نے بھی درخواست دی ہے۔ سپریم کورٹ کی ہدایت کے مطابق ٹریبونل اپنا کام کر رہا ہے۔