بکری کے گلے میں سدپتواور نرمل کی تصویریں ڈال کر بی جے پی حامی ڈاکٹروں کا احتجاج
جعلی ڈاکٹروں کی تقرری کے الزام کے معاملے میں منگل کو ویسٹ بنگال میڈیکل کونسل کے سالٹ لیک دفتر کے سامنے بی جے پی حامی ڈاکٹروں کے ایک طبقے نے احتجاج کیا۔ سرکاری اور نجی، دونوں شعبوں کے ڈاکٹر اس احتجاج میں شامل ہوئے۔ ان کا مطالبہ ہے کہ ریاستی میڈیکل کونسل کے صدر سدیپت رائے اور نائب صدر سوشانت رائے کو استعفیٰ دینا چاہیے۔ دفتر کے سامنے دو بکریوں کے گلے میں سدیپت رائے اور نرمل ماجھی کی تصویریں لٹکا کر ڈاکٹروں نے نعرے بازی کی۔ نرمل ریاستی میڈیکل کونسل کے سابق صدر رہ چکے ہیں۔
سدیپت 2022 سے ریاستی میڈیکل کونسل کے صدر ہیں۔ اس سے پہلے 2013 سے 2021 تک سابق ترنمول رکن اسمبلی نرمل صدر تھے۔ مظاہرین کا الزام ہے کہ سدیپت، سوشانت اور نرمل کی وجہ سے ریاست میں جعلی ڈاکٹروں کی تعداد میں اضافہ ہوا ہے۔ مظاہرین کا دعویٰ ہے کہ اگر انہوں نے فعال کردار ادا کیا ہوتا تو ریاست کے مختلف علاقوں میں اس طرح جعلی ڈاکٹر پھیل نہیں سکتے تھے۔
اب تک پانچ جعلی ڈاکٹروں کے خلاف بیدھان نگر ساو¿تھ تھانے میں شکایت درج کی گئی ہے۔ ان پانچ جعلی ڈاکٹروں میں سے دو کے رجسٹریشن نمبر بھی ایک جیسے ہیں۔ حال ہی میں ریاستی میڈیکل کونسل نے اخبارات میں اشتہار جاری کرکے بتایا کہ شیخ یونس حسن، اتم مائتی، حافظ الرحمن ہالدار، ذوالفقار منڈل اور سعید الحق نامی پانچ ڈاکٹروں کی رجسٹریشن منسوخ کر دی گئی ہے۔ اس اشتہار سے معلوم ہوا کہ ذوالفقار اور سعید الحق کا رجسٹریشن نمبر ایک ہی ہے۔