وزیرِ اعلیٰ نے اسکول کے طلبہ کو نئے انداز کی سائیکلیں دیں
تبدیلی کے بنگال میں ’سبوج ساتھی‘ آو¿ٹ، ’سارتھی‘ اِن۔ اب اسکول کے طلبہ کو نیلے رنگ اور ’بِشوا بنگلہ‘ لوگو کے بجائے زعفرانی رنگ کی، بہتر معیار کی سائیکلیں ملیں گی۔ منگل کو ہاو¿ڑہ کے بیاترا علاقے میں واقع مدھوسودن پال چودھری ہائی اسکول میں وزیرِ اعلیٰ شوبھندو ادھیکاری نے ’سارتھی‘ اسکیم کا باضابطہ افتتاح کیا۔
سابق حکومت کے دور میں طلبہ کو نویں جماعت میں پہنچنے پر سائیکل ملتی تھی۔ وزیرِ اعلیٰ نے بتایا کہ اب آٹھویں جماعت میں ہی ’سارتھی‘ سائیکل دی جائے گی۔ مجموعی طور پر 12.59 لاکھ طلبہ اس اسکیم سے فائدہ اٹھائیں گے۔ اس تقریب کے بعد شوبھندو نے اسکول کے طلبہ کے ساتھ ایک ہی میز پر بیٹھ کر دوپہر کا کھانا، یعنی مڈ ڈے میل بھی کھایا۔ وہ طلبہ کے ساتھ گھل مل گئے۔
ترنمول حکومت کے دور میں تقریباً تمام سماجی منصوبوں میں کسی نہ کسی سطح پر بدعنوانی کے الزامات سامنے آئے تھے۔ ریاست کی نئی بی جے پی حکومت ان الزامات سے پیدا ہونے والی بدنامی کو ختم کرنے کے لیے ابتدا ہی سے سرگرم ہے۔ پرانے منصوبوں کے نام اور سہولیات میں تبدیلی کی گئی ہے۔ اسی تبدیلی کے تحت ممتا بنرجی کی شروع کردہ ’سبوج ساتھی‘ اسکیم میں بھی مکمل تبدیلی کرتے ہوئے اسے ’سارتھی‘ کا نام دیا گیا ہے۔ منگل کو وزیرِ اعلیٰ نے اسی اسکیم کا افتتاح کیا۔
ہاو¿ڑہ کے بیاترا اسکول سے خطاب کرتے ہوئے انہوں نے کہا، ”میں نے وعدہ کیا تھا کہ نئی اسکیم شروع کی جائے گی۔ صرف نام اور لوگو تبدیل نہیں کیے گئے ہیں، بلکہ معیار کی جانچ کا بھی انتظام ہوگا۔ سائیکل میں مناسب لائٹ اور ٹائر کا انتظام کیا گیا ہے اور معیار کو بہتر بنایا گیا ہے۔ اسکول کے طلبہ کی حفاظت کو مدنظر رکھتے ہوئے ہم نے یہ اقدامات کیے ہیں۔“
سابق حکومت پر طنز کرتے ہوئے شوبھندو نے کہا، ”کئی لوگوں نے سوال اٹھایا تھا کہ بند اسکیم دوبارہ شروع ہوگی یا نہیں۔ ہم نے اسے شروع کر دیا۔ پہلے سابق وزیرِ اعلیٰ کے رشتہ دار یہ کام کیا کرتے تھے۔ ہم نے سب کچھ بدل دیا ہے۔ پہلے پنجاب سے پرزے لاکر یہاں سائیکلیں تیار کی جاتی تھیں۔ اب سے سائیکلیں مکمل طور پر یہیں تیار ہوں گی۔ سائیکل فیکٹری کے لیے زمین بھی فراہم کی جائے گی۔“