پارک اسٹریٹ کے فٹ پاتھ پر کیروسین اسٹوو پر دودھ گرم کرنے والے ایک معمولی واقعے نے مغربی بنگال کی سیاست میں نیا طوفان کھڑا کر دیا ہے۔ وزیر بلدیات اور فائر سروسز کی جانب سے فٹ پاتھ پر رہنے والی خاتون "سیتا عرف رشیدہ" کو ڈانٹنے کی ویڈیو وائرل ہونے کے بعد سابق وزیراعلیٰ ممتا بنرجی اور موجودہ وزیراعلیٰ شبھیندو ادھیکاری کے درمیان شدید سیاسی زبانی جنگ شروع ہو گئی ہے۔

خبروں کے مطابق، اس سیاسی کھینچ تان کے بعد کولکاتا میونسپل کارپوریشن نے خاتون اور ان کے اہل خانہ کے لیے سرپناہ کا انتظام کیا تھا، لیکن رشیدہ اور ان کی چھوٹی بیٹی نے سرکاری شیلٹر ہوم میں رہنے سے صاف انکار کر دیا ہے۔
پارک اسٹریٹ میں وزیر بلدیات نے فٹ پاتھ پر بچے کے لیے دودھ گرم کرنے پر خاتون پر برہمی کا اظہار کیا تھا۔ اس واقعے کی ویڈیو وائرل ہونے پر شدید تنقید کی گئی۔

سابق وزیراعلیٰ ممتا بنرجی نے اس کارروائی کو تنقید کا نشانہ بناتے ہوئے خاتون کی مدد کا اعلان کیا۔ دوسری جانب وزیراعلیٰ شبھیندو ادھیکاری نے 'جنتا دربار' میں خاتون سے ملاقات کی اور انہیں مکمل تحفظ اور رہائش فراہم کرنے کی یقین دہانی کرائی۔

کے ایم سی کی جانب سے بیلیا گھاٹا اور راجہ رام موہن سرنی کے 'آشرے' (بے گھر افراد کے شیلٹر ہوم) میں انتظام کیا گیا تھا۔ تاہم، رشیدہ اور ان کی چھوٹی بیٹی نے گاڑی سے اترنے اور وہاں قیام کرنے سے انکار کر دیا۔
خاتون کا موجودہ مقام: بی جے پی کے مقامی لیڈروں کے مطابق، سرکاری شیلٹر ہوم میں رہنے سے انکار کے بعد اب رشیدہ اور ان کی چھوٹی بیٹی کو جنوبی کولکاتا میں پارٹی کے اقلیتی سیل کے ایک رہنما کے گھر پر محفوظ مقام پر ٹھہرایا گیا ہے، جبکہ ان کی بڑی بیٹی پوجا فی الوقت سرکاری شیلٹر میں ہی موجود ہے۔

فٹ پاتھ پر پڑا سامان اور مختلف جگہوں پر بکھرا ہوا یہ خاندان فی الحال ریاستی سیاست کے مرکز میں بنا ہوا ہے۔