اکرا،نئی دہلی، 3 جولائی : وزیر اعظم نریندر مودی کو گھانا کے اعلیٰ ترین اعزاز ’دی آفیسر آف دی آرڈر آف دی اسٹار آف گھانا‘سے نوازا گیا۔ گھانا کے صدر جان مہاما نے انہیں اس اعزاز سے نوازا ۔ مسٹر مودی نے اس عزاز کے لیے گھانا کے صدر کا شکریہ ادا کیا اور اسے انتہائی فخر کی بات قرار دیاہے ۔ وزیر اعظم مودی نے گھانا کے صدر مہاما کے ساتھ دو طرفہ تعلقات کو ایک جامع شراکت داری تک بڑھانے پر اتفاق کیا۔ دونوں ممالک کے سرکردہ رہنماؤں نے دفاع، سیکورٹی، ہنرمندی کی ترقی اور زراعت جیسے شعبوں میں شراکت داری کو بڑھانے کا فیصلہ کیا ہے۔ وزیر اعظم نے 140 کروڑ ہندوستانیوں کی جانب سے ایوارڈ قبول کرتے ہوئے اس اعزاز کو ہندوستان کے نوجوانوں کی امیدوں، اس کی ثقافتی روایات اور تنوع نیز گھانا اور ہندوستان کے درمیان تاریخی تعلقات کے لئے وقف کیا۔ مسٹر مودی نے اس خصوصی اعزاز کے لئے گھانا کے عوام اور حکومت کا شکریہ ادا کیا۔وزیراعظم نے کہا کہ یہ ایوارڈ دونوں ممالک کے درمیان دوستی کو مزید گہرا کرتا ہے اور ان پر دوطرفہ تعلقات کو آگے لے جانے کی نئی ذمہ داری ڈالتا ہے۔ انہوں نے کہا کہ گھانا کا یہ تاریخی سرکاری دورہ دونوں ممالک کے درمیان تعلقات کو نئی تحریک دے گا۔ مسٹر مودی نے سوشل میڈیا پلیٹ فارم ایکس پر ایک پوسٹ میں کہا کہ ’’دی آفیسر آف دی آرڈر آف دی اسٹار آف گھانا‘‘ کے خطاب سے نوازا جانا فخر کی بات ہے۔

Source: uni urdu news service