پاکستان ٹیسٹ ٹیم کے کپتان شان مسعود نے اس عزم کا اظہار کیا ہے کہ وہ ویسٹ انڈیز کے خلاف آئی سی سی ٹیسٹ چیمپئن شپ کا حصہ دو ٹیسٹ میچز پر مشتمل سیریز 0-2 سے جیتنے کے خواہش مند ہیں۔ شان مسعود کا کہنا تھا کہ جنوبی افریقہ میں سینچورین کا پہلا ٹیسٹ جیت کے قریب پہنچ کر ہارنے کا بےحد افسوس ہے۔ انہوں نے یہ بھی کہا کہ لیکن اس طرح ہمارے ساتھ پہلی بار نہیں ہوا۔ آسڑیلیا اور بنگلادیش کے خلاف ٹیسٹ میچز میں ہماری ٹیم بہترین پوزیشن سے میچ ہار چکی ہے۔ کیپ ٹاؤن ٹیسٹ کی دوسری اننگز میں بابر اعظم کیساتھ پہلی وکٹ پر 205 رنز کی شراکت کے سوال پر کپتان کا کہنا تھا کہ مڈل آرڈر اگر مزاحمت کرتا، تو ہم جنوبی افریقہ کو فتح کےلیے بڑا ہدف دے سکتے تھے۔ شان مسعود بولے کے ہمیشہ آگے کی طرف دیکھنا چاہیے، اب ہم ہوم گراؤنڈ پر ویست انڈیز کے مقابلے پر اسپنرز کیساتھ حکمت عملی کیساتھ میدان میں اتریں گے۔ انگلینڈ کے خلاف جیت پر گفتگو کرتے ہوئے کپتان نے کہا کہ ملتان میں ایک بار پھر ہم اسپنرز پر انحصار کریں گے۔ امید کرتے ہیں کہ انگلینڈ کے خلاف جیت کے تسلسل کو آگے لے کر چلیں۔ 35 سالہ شان مسعود جنہوں نے پاکستان کےلیے 40 ٹیسٹ کی 76 اننگز میں 30.66 کی اوسط سے 2300 رنز 6 سنچریوں کی مدد سے اسکور کیے، اس توقع کا ظہار کیا کہ ملتان میں پاکستان ٹیم ویسٹ انڈیز کو دو ٹیسٹ کی سیریز میں 0-2 سے ہرانے میں کامیاب رہے گی۔

Source: social media