بدھ کو بنگال بھر میں ’سیوا جیوتی یاترا‘، جائنٹ اسکرین پر دکھائی جائے گی مودی کی تقریر
وزیر اعظم نریندر مودی کو انتظامی سربراہ کی حیثیت سے 25 سال مکمل ہوگئے ہیں۔ اسی مناسبت سے ملک بھر میں بی جے پی کی جانب سے ’سیوا سنکلپ ابھیان‘ جاری ہے۔ اس پروگرام کے آخری دن، 7 اکتوبر کو ملک بھر میں ’سیوا جیوتی یاترا‘ نکالنے کا منصوبہ بنایا گیا ہے۔ ریاستی بی جے پی کے صدر شمیک بھٹاچاریہ نے پیر کو پریس کانفرنس کرکے اس منصوبے کا اعلان کیا۔
شمیک نے کہا، ”پارلیمانی جمہوریت کی تاریخ میں مسلسل 25 سال تک حکومت کے سربراہ کے عہدے پر رہنا ایک نایاب واقعہ ہے۔ 7 اکتوبر کو ہم ملک بھر میں سیوا جیوتی یاترا نکالیں گے۔“
اس دن بنگال کے ہر ضلع میں بھی بی جے پی کی جانب سے پیدل مارچ کا اہتمام کیا جائے گا۔ پروگرام کا آغاز وزیر اعظم نریندر مودی اور بی جے پی کے آل انڈیا صدر نتن نوین کی تقریر سے ہوگا۔ ان تقاریر کو ملک بھر میں جائنٹ اسکرین کے ذریعے دکھایا اور سنایا جائے گا۔
مغربی بنگال میں 23 انتظامی اضلاع ہیں۔ تمام اضلاع کے صدر مقامات پر جائنٹ اسکرین نصب کرکے یہ تقریر دکھائی جائے گی۔ یہ پروگرام کھلے مقامات کے ساتھ ساتھ انڈور اسٹیڈیم میں بھی منعقد ہوگا۔ مودی کی تقریر ختم ہونے کے بعد ’سیوا جیوتی یاترا‘ شروع ہوگی۔ بی جے پی کارکنان ہاتھوں میں مشعل لے کر اس پیدل مارچ میں شرکت کریں گے۔
شمیک نے بتایا، ”اس پروگرام میں بی جے پی کارکنان اور حامیوں کے ساتھ عام لوگ بھی شامل ہوں گے اور مودی جی کو اپنا آشیرواد دیں گے۔“
دوسری جانب، محلے محلے عوام سے رابطہ مضبوط کرنے کے لیے بوتھ کی سطح پر پروگرام تیار کرتے ہوئے بنگال بی جے پی نے انتخابی مہم کے لیے آٹھ نکاتی گائیڈ لائن جاری کی ہے۔ میونسپل انتخابات شروع ہونے سے پہلے تک پوجا کے موسم میں یہ مہم جاری رہے گی۔ زعفرانی خیمے کے ذرائع کے مطابق نومبر تک اس سلسلے میں ہدایات جاری کی گئی ہیں۔
پارٹی کی نچلی سطح پر عوام سے رابطے میں کمی رہنے کی بات سامنے آئی ہے۔ فی الحال ریاست میں بی جے پی اقتدار میں ہے۔ اسی لیے عوامی رابطے کی کمی کو دور کرنے کے لیے اعلیٰ قیادت کی جانب سے بوتھ کارکنان کو میدان میں اترنے کی ہدایت دی گئی ہے۔
سب سے پہلے کارکنان کو گھر گھر جاکر حکومت کے ترقیاتی کاموں کے بارے میں مسلسل تشہیر کرنی ہوگی۔ پہلے ہی ’سیوا کیمپ‘ کے ذریعے مختلف سرکاری منصوبوں کے فوائد عام لوگوں تک پہنچانے کے ساتھ ساتھ بی جے پی کے اراکین اسمبلی، ضلع صدور اور دیگر رہنماو¿ں نے عوام سے رابطہ قائم کیا ہے۔رکن اسمبلی رودرنیل گھوش نے بتایا کہ ’سیوا سیتو کیمپ‘ میں شہریوں نے مرکزی اور ریاستی حکومت کی مختلف اسکیموں کے لیے اپنے نام درج کرائے ہیں۔