رنگ کی وجہ سے حادثے کا کوئی ثبوت نہیں، ریلز بنائی جا رہی تھیں یا نہیں، اس کی جانچ ہوگی: پولیس کمشنر
چنگڑی گھاٹا فلائی اوور پر موٹر سائیکل حادثہ کیوں پیش آیا، پولیس اس کی جانچ کر رہی ہے۔ تاہم اس بات کا کوئی ثبوت نہیں ملا کہ فلائی اوور پر رنگ کیے جانے کی وجہ سے موٹر سائیکل کے پہیے پھسلے تھے۔ جمعرات کو کولکاتا کے پولیس کمشنر اجے نندا نے یہ بات کہی۔ انہوں نے بتایا کہ پولیس اس پہلو کی بھی جانچ کرے گی کہ کہیں موٹر سائیکل چلاتے ہوئے ریلز بنانے کی کوشش تو نہیں کی جا رہی تھی۔ اب تک حادثے کی اصل وجہ کی تصدیق نہیں ہو سکی ہے۔ حادثات سے بچنے کے لیے پولیس پہلے ہی کئی اقدامات کر چکی ہے۔ آنے والے دنوں میں بارش ہونے پر مذکورہ فلائی اوور پر موٹر سائیکلوں کی آمدورفت محدود کی جا سکتی ہے۔
درگا پوجا سے قبل کولکاتا کے کئی فلائی اوورز کو دلکش رنگوں سے سجایا گیا ہے۔ چنگڑی گھاٹا فلائی اوور کو بھی خاص طور پر قوسِ قزح کے رنگوں سے سجایا گیا ہے۔ لیکن بدھ کو بارش کے باعث اس فلائی اوور پر گیلی سڑک پر یکے بعد دیگرے دو موٹر سائیکلیں پھسل کر گر گئیں۔ اس واقعے کی ویڈیو سوشل میڈیا پر پھیل گئی۔ کئی لوگوں نے دعویٰ کیا کہ رنگ کیے جانے کی وجہ سے بارش میں سڑک مزید پھسلن بھری ہو گئی تھی، جس سے موٹر سائیکلوں کے پہیے پھسلنے اور حادثے کا خطرہ بڑھ گیا۔
پولیس کمشنر نے ان الزامات کو تقریباً مسترد کر دیا۔ انہوں نے کہا، ”انجینئروں اور ماہرین سے بات کرنے کے بعد ہمیں معلوم ہوا ہے کہ سڑک پر جو رنگ کیا گیا ہے، وہ پھسلن سے بچاو¿ والا (اینٹی اسکڈ) ہے۔ اس بات کا کوئی ثبوت نہیں ہے کہ موٹر سائیکلیں صرف رنگ کی وجہ سے گری تھیں۔ بارش ہو رہی تھی۔ ہمیں معلوم ہوا ہے کہ موٹر سائیکل پر کچھ ویڈیوز بنانے کی کوشش کی جا رہی تھی۔ بہت سے لوگ گاڑی چلاتے ہوئے ریلز بناتے ہیں۔ اس وجہ سے بھی کوئی اپنا توازن کھو سکتا ہے۔ ہم جانچ کر رہے ہیں کہ حادثہ کس وجہ سے پیش آیا۔ سڑک پر کیٹس آئی لگائی گئی ہیں اور ’آہستہ چلیں‘ کے بورڈ بھی نصب کیے گئے ہیں۔“
پولیس کمشنر کا خیال ہے کہ جن فلائی اوورز پر تیز موڑ ہیں، وہاں بارش کے بعد اس طرح کے حادثات پیش آ سکتے ہیں۔ اسی کے مطابق اقدامات کیے جا رہے ہیں۔ ان مقامات پر گاڑیوں کی رفتار کم رکھنے کے انتظامات کیے گئے ہیں۔ سڑک پر کیٹس آئی لگائی گئی ہیں، تاکہ سطح قدرے ناہموار رہے اور گاڑیوں کی رفتار کو قابو میں رکھنے میں مدد ملے۔
پولیس کمشنر نے بتایا کہ بارش کے دوران حفاظتی اقدامات کے تحت فلائی اوورز پر موٹر سائیکلوں کی آمدورفت بند بھی کی جا سکتی ہے۔ ان کے مطابق، ”جن فلائی اوورز پر موڑ ہیں، وہاں حفاظتی وجوہات کی بنا پر بارش کے دوران موٹر سائیکلوں کی آمدورفت کو کسی حد تک محدود کیا جا سکتا ہے، تاکہ حادثات نہ ہوں۔ گڑیاہاٹ پل پر ایسا کچھ نہیں کیا جا رہا، کیونکہ وہاں سڑک سیدھی ہے اور کوئی موڑ نہیں ہے۔ یہاں موڑ تھا، اسی لیے ایسا ہوا۔“
جمعرات کو لال بازار میں ’بندھو کولکاتا‘ کے افتتاحی پروگرام میں پولیس کمشنر اجے نندا نے شرکت کی تھی۔ یہ کولکاتا پولیس کی ایک خصوصی پہل ہے، جس کے ذریعے درگا پوجا کے موسم میں گم ہو جانے والے افراد کو تلاش کرنے میں مدد فراہم کی جائے گی۔ اسی پروگرام میں شرکت کے دوران پولیس کمشنر سے چنگڑی گھاٹا فلائی اوور پر پیش آنے والے حادثے کے بارے میں سوالات کیے گئے۔