Article | Akhbar-e-mashriq

National

مولانا خالد سیف اللہ رحمانی صدر آل انڈیا مسلم پرسنل لا بورڈ کی طرف سے ملت اسلامیہ ہند کے نام ہدیۂ تشکر

نئی دہلی، 13 ستمبر : مولانا خالد سیف اللہ رحمانی صدر آل انڈیا مسلم پرسنل لا بورڈ نے اپنے بیان میں تمام مسلمانوں کا شکریہ ادا کیا ہے کہ انھوں نے بورڈ کی آواز پر لبیک کہا ، اور وقف ترمیمی بل کے خلاف جوائنٹ پارلیمانی کمیٹی کو بڑی مقدارمیں ای میل روانہ کیئے۔ انہوں نے جاری شکریہ نامہ میں کہا کہ اللہ کرے کہ حکومت جمہوری تقاضوں کو سامنے رکھ کر اس بل کو واپس لے لے اور ایسا قانون بنانے سے گریز کرے جو اقلیت دشمنی پر مبنی ہ۔ انہوں نے مسلمانوں سے اپیل کی ہے کہ وہ اس بل کی واپسی کے لیے خوب دعا کا اہتمام کریں ، کیونکہ کوئی بھی واقعہ خواہ وہ خوش کن ہو یا تکلیف دہ، اللہ کی مرضی کے بغیر پیش نہیں آسکتا۔ انہوں نے کہا ہے کہ بورڈ اس بل کو روکنے کے لیے قانون و آئین کے دائرہ میں رہتے ہوئے مختلف سطح پر کوشش کر رہا ہے، اور وہ حالات کو سامنے رکھ کر احتجاج کی مختلف پر امن صورتوں کے بارے میں فیصلہ کرے گا، اس لئے مسلمانوں کو چاہئے کہ بورڈ جب بھی آواز دے، اور جس بات کی اپیل کرے، تمام مسلمان دل و جان سے اس پر عمل کریں، اور وقف کی اہمیت کے پیشِ نظر ہر طرح کی قربانی دینے کو تیار رہیں۔

Source: uni news service