مغربی کنارے میں آباد کاروں کے حملوں کی ریکارڈ تعداد سامنے آئی ہے: امریکی اخبار

امریکی اخبار "نیویارک ٹائمز" نے اقوام متحدہ اور اسرائیلی سرکاری ایجنسیوں کے اعداد و شمار کا حوالہ دیتے ہوئے کہا کہ اسرائیلی آباد کاروں نے اس سال مغربی کنارے میں فلسطینی شہریوں پر ریکارڈ تعداد میں حملے کیے ہیں۔ یاد رہے مغربی کنارے پر فلسطینی اتھارٹی کا جزوی کنٹرول ہے۔ اقوام متحدہ کے دفتر برائے رابطہ انسانی امور کے مطابق اسرائیلی آباد کاروں نے 2025 کے پہلے نصف میں فلسطینیوں اور ان کی املاک پر تقریباً 750 حملے کیے ہیں۔ یہ 2006 میں اقوام متحدہ کی ایجنسیوں کے اعداد و شمار جمع کرنا شروع کرنے کے بعد سے ایک ریکارڈ تعداد ہے۔ اسرائیلی فوج کی اندرونی رپورٹس سے یہ بھی انکشاف ہوا کہ اس سال کے آغاز سے 440 حملے ریکارڈ کیے گئے ہیں۔ حملوں کی تعداد میں 7 اکتوبر 2023 کو جنگ شروع ہونے کے بعد سے نمایاں اضافہ ہوا تاہم 2025 میں غزہ کی پٹی میں تنازع کے بڑھنے سے مغربی کنارے کی صورتحال بھی مزید خراب ہوگئی ہے۔ "نیویارک ٹائمز" کے مطابق اسرائیلی فوج، جو جزوی طور پر مغربی کنارے پر کنٹرول رکھتی ہے، شاذ و نادر ہی اسرائیلی آباد کاروں پر مقدمہ چلاتی ہے۔ اخبار نے کہا ہے کہ اسرائیلی فوج نے سات اکتوبر کے بعد مغربی کنارے میں اپنی موجودگی کو بڑھا دیا ہے اور پھر بھی آباد کاروں کے حملوں کو روکنے میں ناکام رہی ہے اور فلسطینیوں پر ہونے والے حملوں کو نظر انداز کر رہی ہے۔

Source: Social media