مبینہ شرعیہ قانون نافذ کرنے کی سازش کرنے والے گروہ کا ماسٹر مائنڈ گرفتار

لکھنؤ:30 ستمبر : اتر پردیش کی اینٹی ٹیررازم اسکواڈ (اے ٹی ایس) نے ملک مخالف سرگرمیوں میں ملوث ایک بڑے نیٹ ورک کا انکشاف کرتے ہوئے اس کے مبینہ ماسٹر مائنڈ محمد رضا کو کیرالہ کے مَلپورم سے گرفتار کیا ہے۔ محمد رضا، جو بنیادی طور پر اتر پردیش کے فتح پور کے انداؤلی گاؤں کا رہنے والا ہے طویل عرصے سے کیرالہ میں مقیم اور سرگرم تھا۔ اس سے قبل کانپور، رامپور، سون بھدر اور سلطان پور سے چار ملزمان کو گرفتار کیا جا چکا ہے۔ اے ٹی ایس کے اہلکاروں کے مطابق یہ گروہ ’مجاہد آرمی‘ کے نام سے تنظیم بنا رہا تھا، جس کا مقصد صوبے میں فسادات بھڑکانا، غیر مسلم مذہبی پیشواؤں کو ہدف بنا کر قتل کرنا اور ہتھیاروں کے ذریعے ملک میں شرعی قانون نافذ کرنا تھا۔ گرفتار ملزمان پر الزام ہے کہ وہ پاکستانی انتہاپسند تنظیموں سے متاثر ہو کر مسلسل اجلاس کرتے اور سوشل میڈیا گروپس کے ذریعے لوگوں کو اکساتے تھے۔ پولیس انسپکٹر شیلندر سنگھ نے بتایا کہ کانپور کے سوجات گنج سے محمد توصیف، سلطان پور سے اکمَل رضا، سون بھدر سے سفیل سلمانی المعروف علی رضوی اور رامپور کے قاسم علی پہلے ہی گرفتار ہو چکے ہیں۔ پوچھ گچھ میں انکشاف ہوا کہ یہ تمام لوگ آڈیو-ویڈیو پیغامات کے ذریعے انتہاپسند نظریات پھیلاتے اور ہتھیار خریدنے کے لیے مختلف ذرائع سے فنڈز اکٹھے کرتے تھے۔ گروہ کی اکثریتی رقم ماسٹر مائنڈ محمد رضا کے بینک اکاؤنٹ میں جاتی تھی۔ اے ٹی ایس کی تحقیقات میں یہ بھی سامنے آیا کہ گروہ نے غیر مسلم مذہبی پیشواؤں کو ہدف بنانے کی گہری سازش تیار کی تھی۔ ملزمان پر الزام ہے کہ وہ پرتشدد جہادی مواد جمع کرتے اور اس کے ذریعہ نوجوانوں کو متاثر کر رہے تھے۔ محمد رضا کو ضابطے کے مطابق ٹرانزٹ ریمانڈ پر لکھنؤ لایا جا رہا ہے، جہاں اسے خصوصی عدالت میں پیش کیا جائے گا۔ اہلکاروں کا ماننا ہے کہ اس کے نیٹ ورک کی تہیں کھلنے کے بعد اس معاملے میں مزید اہم انکشافات سامنے آ سکتے ہیں۔ فی الحال اے ٹی ایس نے لکھنؤ تھانہ میں مقدمہ درج کر کے تمام ملزمان سے گہری پوچھ گچھ شروع کر دی ہے۔

Source: uni urdu news service